The Definitive Guide to Living in the Capital , Cairo , Egypt

زي ما رمضان بيحب لمة الفطار، بيحب كمان لمة السحور. وسحور يعني فول، والقاهرة مليانة عربيات فول. فقولنا نجمع لكم أشهر 7 عربيات فول ممكن تتسحروا عندهم:

خالد ومبي – إمبابة

خالد ومبي هي عربية فول مشهورة بشارع الوحدة في إمبابة. معروفة بجودتها وسعرها. أول ما توصل شارع الوحدة، اسأل على ومبي، ومليون من يدلك.

سعد الحرامي – وسط البلد

سعد الحرامي. وحرامي ده لقب أطلقه عليه الفنان القدير فريد شوقي، بسبب لعب الدومينو. متواجد في شارع شامبليون، وعنده خلطة حلوة ومميزة. كمان بيبيع شكشوكة وفول بالسجق.

بشندي – مدينة نصر

بشندي يعتبر من أشهر عربيات الفول في محيط مدينة نصر. ودايمًا زحمة، وأماكن الجلوس مش كتيرة. للأسف هتتعب شوية لحد ما تطلب سحورك.

حمادة شيراتون – مساكن شيراتون

حمادة شيراتون غني عن التعريف. وشهرته مش في منطقته بس، لا ده الناس بتروح له من كل حتة مخصوص. بيبقى زحمة جدًا، لكن الطلبات بتنزل بسرعة. زائد نظافة المكان وجودة الخدمة.

الجحش – السيدة زينب

الجحش ده كان عربية فول صغيرة جنب قسم السيدة، حاليًا عنده كشك معروف. عنده 3 أنواع فول: زيت حار – زيت زيتون – زبدة. لازم تحجز بدري علشان تقعد، وممكن تقعد على أي قهوة وتبعت تجيب طلباتك.

محروس – جاردن سيتي

محروس بقى بيمشيها طابور، وبيتميز بالبيض المدحرج. سعره غالي بس تمنه فيه. أول عربية فول في مصر تقدم خدمة فندقية متميزة. المهم تلتزم بالقواعد بتاعته، خاصة إن زبائنه من الأجانب كتير. ومش بيحب الدوشة في منطقة أكل عيشه.

عم عطية – المعادي

عم عطية هيكون موجود في شارع 250، جنب جراند مول. هو الأشهر على الإطلاق في المعادي، من حيث جودة الفول أو الخدمة. شد حيلك بقى يا بطل، واخترق الصفوف واطلب كل الأصناف.