لعشاق السفر: اعرفوا كل الدول اللي محتاجة تصريح أمني قبل السفر لها
Cairo 360
موضوع مهم لكل الناس اللي بتتحرك كتير برة مصر سواء للشغل أو للسياحة، وزارة الداخلية أضافت مجموعة دول جديدة على قايمة الدول اللي لازم تاخد لها تصريح أمني لو نويت تسافر لها، وفي المقال ده #كايرو_360 هتقول لكم على الدول دي وخطوات الحصول على التصريح الأمني بالتفصيل.
الدول اللي اشتمل عليها التقرير كانت: السودان واليمن والأردن وماليزيا وكوريا الجنوبية وغينيا كوناكري وإسرائيل وإندونيسيا وتايلاند وجنوب إفريقيا وتركيا وقطر وسوريا ولبنان والعراق وليبيا.
وفي حال أن حد مسافر لأي دولة فيهم لم يستخرج التصريح الأمني هيتم توقيفه وعرضه على الجهات الأمنية في المطار للفحص ومعرفة أسباب السفر، وعلى أساسه هيتم السماح ليه بالسفر أو رفضه.
وعن أسباب الإجراء ده قال التقرير أن دول كتير في العالم بتتم فيها إجراءات مشابهة وأنه الموضوع مش جديد، والسبب دايمًا محاولة حماية المجتمع العالمي من خطر تنامي المنظمات المحظورة اللي بتستقطب الشباب ليها، واللي أماكن نشاطها بتتمركز في دول معينة زي بعض الدول المذكورة.
أما عن الإجراءات المطلوبة وتفاصيلها فكان سرد التقرير لها كالآتي:
– من بين الدول المذكورة تقدر تسافر لماليزيا أو إندونيسيا من غير استخراج التصريح الأمني لو جواز سفرك فيه بيانات شغلك أو مؤهلك الدراسي، أما بقية الدول فلازم تستخرج التصريح في كل الأحوال.
– الأوراق المطلوبة لاستخراج التصريح: الفيزا بتاعت الدولة اللي هتتجه ليها، وجواز السفر الخاص بيك، وصورة منهم (من الفيزا وجواز السفر).
– الأوراق بيتم تقديمها في مجمع التحرير، وده المكان الوحيد لاستخراج التصريح في مصر كلها مهما كان محل إقامتك.
– لازم تتواجد بنفسك، غير مسموح بأنك تبعت حد مكانك يخلص الإجراءات.
– وأنت بتملى الاستمارة لازم تدخل اسمك رباعي وتتأكد من إدخال تاريخ ميلاد الوالد.
– التصريح مطلوب من سن 18 لـ 40 سنة بس، لو أنت سنك فوق كده أو تحت كده يبقى الكلام مش ليك.
– التصريح ساري لمدة شهرين بس، لو السفر بعد المدة دي يبقى التصريح لاغي ولازم تستخرجه من جديد.
– بالنسبة لتركيا: لو أنت مقيد في جواز السفر طالب أو حاصل على مؤهل عالي يجب أن نوع الفيزا يكون زيارة مش سياحة.
– بالنسبة للطلبة: السفر لأي دولة من قايمة الدول دي غير ممكن إلا في حال تلقي دعوة من سفارة الدولة اللي هتسافر ليها، وده إجراء غير اعتيادي وصعب جدًا إتمامه.
– حاجة أخيرة: التصريح هياخد 4 أيام علشان يخلص وتستلمه، فاعمل حسابك علشان ماتتزنقش في الوقت.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
