The Definitive Guide to Living in the Capital , Cairo , Egypt

رنا شرف

الخضرة والزهور من الحاجات الأساسية في يوم شم النسيم، علشان كده كتير مننا بيحب خروجة الحدائق وبتبقي حاجة مميزة، لكن للأسف شم النسيم السنة دي كان في رمضان، وبسبب الصيام ناس كتير ماقدرتش تخرج وتستمتع بالطبيعة، لكن في عيد الفطر 2022 عندنا فرصة تانية نخرج ونستمتع بالجو الربيعي المبهج وبالشمس الجميلة.

تعالوا نتعرف على أفضل الحدائق المفتوحة في القاهرة اللي ممكن نتستمتع فيها بالعيد.

 

حديقة الفنون

لو عايز تروح مكان بيجمع بين الخضرة والنيل يبقي حديقة الفنون هتبسطك قوي، بسبب موقعها المميز على النيل في شارع عبد العزيز أل سعود، وهناك ممكن تشرب قهوة أو شاي في الحديقة، وسعر التذكرة رخيص.

حديقة الفنون هتعجب أكيد كل أفراد الأسرة.

الأزهر بارك

من الحدائق المميزة في القاهرة، واللي تعتبر مكان محافظ علي شكله من سنين، وكمان الحديقة هتقدر تعمل فيها فوتوسيشن حلو لأنها جميلة والخضرة فيها مميزة ومبهجة.

الحديقة كبيرة وفيها مطاعم كمان، يعني هتستمع بجو حلو وتستمتع بأكل جميل.

حديقة الأسرة (فاميلي بارك)

من الحدائق الحلوة واللي فعلًا بتناسب كل أفراد الأسرة، وفيها مساحة جميلة وملاهي وقطار بيلف الحديقة كلها وملاهي مائية ممتعة. الحديقة فعلًا مبهجة وكمان فيها مطاعم متنوعة، يعني ممكن تقضي اليوم كله في الحديقة وماتحسش بملل كمان لو بتحب الطيور والحيوانات هتسمتع أوي بالبجع والنعام والطاووس والغزلان.

 

حديقة الأورمان

لو بتحب الزهور والأشجار يبقى أكيد هتلاقي نفسك في الأورمان، اللي فيها كمية نباتات جميلة ونادرة، وفيها كمان مساحة كبيرة خضرا للناس إللي بتحب الطبيعة والتأمل، كمان التصوير هناك ممتع، ولو بتحب الرياضة وركوب العجل يبقي خد العجلة معاك ولف بيها في جو الخضرة الممتع ده.

 

حديقة الدراجات

حديقة جميلة ومعمولة مخصوص للناس إللي بتحب الرياضة وركوب العجل، الحديقة مبهجة لأنها بتجمع بين ركوب العجل ومساحة جميلة من الخضرة، كمان فيها ملاعب للكرة تقدر تلعب فيها يعني الحديقة دي رياضية بامتياز، وطبعًا بما أننا خارجين من رمضان والعزومات والحلويات فمحتاجين نغير ونلعب شوية رياضة.

 

حديقة الفسطاط
بتعتبر حديقة الفسطاط من أقدم الحدائق في مصر القديمة، وهي قريبة من سور مجرى العيون، وفيها مساحات خضرا واسعة، كمان الحديقة فيها ألعاب ملاهي وطفطف لعمل جولة في كل أنحاء الحديقة. هتستمتعوا قوي في الحديقة دي في العيد.

وكل سنة وأنتم بخير وسعادة وفرح يا أهل القاهرة الكرام!