The Definitive Guide to Living in the Capital , Cairo , Egypt

الحياة في كايرو

لندن كاب.. هتروح أي مشوار مخصوص علشان تركبه

london cap القاهرة تطبيق خدمة رحلة زحمة سعر لندن كاب مواصلة
لندن كاب.. هتروح أي مشوار مخصوص علشان تركبه
بواسطة
Mohamed Talaat

روحنا سيتي ستارز في مدينة نصر، وكنا عايزين نرجع لوسط البلد. فقررنا نطلب “لندن كاب” وننقل لكم التجربة.

فتحنا التطبيق وحددنا مكان تواجدنا بشكل يودي مش أوتوماتيك، واخترنا وجهتنا لوسط البلد. ظهرت لنا مواعيد مختلفة نختار منها وقت الرحلة، واخترنا “الآن”. الرحلة كانت بسعر 120 جنيه، والموافقة على الطلب كانت خلال 26 ثانية. كان بينا وبين الكابتن 8 دقائق بس، كلمناه بعد ما ظهر اسمه ورقمه في التطبيق. حددنا موقعنا ووصل بالفعل في نقطة الالتقاء.

ركبنا العربية وكانت واسعة جدًا من جوة، حمولة 5 أفراد. والعربية متقسمة لكرسيين منفصلين ورا السائق، وكنبة وراهم. وأول ما ركبنا سألنا لو محتاجين التكييف، من غير ما نطلب. لاحظنا إن العربية كمان مجهزة لذوي الاحتياجات الخاصة، علشان تسهل عليهم الركوب. لو شايل حاجات كتيرة أو شنط ليهم مكانين، إما في الشنطة الخلفية للعربية، أو جنب السائق. لأن المساحة جنب السائق مخصصة لكده، ومفيهاش كرسي للركوب.

حساب الرحلات في لندن كاب مختلف كتير عن باقي التطبيقات، ولهم شوية شروط ملتزمين بيها. أقل سعر للرحلة هو 100 جنيه. والتكلفة بتتحدد بالمنطقة مش بالكيلو مترات. كمان من حقك 10 دقايق انتظار بعد الطلب، بعد كده بيتحسب عليك 2 جنيه عن كل دقيقة. في المطار مسموح لك بـ 45 دقيقة، قبل ما يتحسب عليك تكلفة إضافية.

لو حجزت رحلة فورية وحبيت تلغيها، بيخصم منك المبلغ المحدد كامل. في حالة الحجز المسبق، لو لغيت قبل الميعاد بنص ساعة بتتحاسب على 50% من التكلفة. وأقل من نص ساعة، هتتحاسب على التكلفة كاملة.

كمان لندن كاب بيوفر خدمة الطلب عن طريق الهاتف. يعني انت لو مش متاح لك التطبيق، تقدر تكلمهم على 19670.  طبقًا لسياسة الشركة، ممنوع دخول العربيات للمناطق الشعبية والطرق الداخلية. كمثال على الأماكن دي: إمبابة – وراق – عين شمس – كفر طهرمس – طالبية – السلام، وغيرهم.

بشكل عام التجربة كانت مميزة جدًا، وعندهم نظام أمان متكامل. ممنوع السائق يزيد سرعته عن 70 ك/س داخل المدينة.  و100 ك/س بالطرق السريعة. ودي صفحتهم على فيسبوك.

مقترح