The Definitive Guide to Living in the Capital , Cairo , Egypt

شم النسيم داخل علينا، وكل واحد بيفكر هيقضيه فين. وعلشان متتعبش ولا تدور كتير، إحنا في كايرو 360 جبنا لك أهم 6 حدايق ومتنزهات عامة تقدر تقضي يومك فيها:

1- حديقة الأورمان

أيوة هي اللي فيها معرض الزهور. رسم دخولها 2 جنيه في الأيام العادية، و10 جنيه في الأعياد. مكانها في شارع الدقي، جنب مديرية أمن الجيزة. ولها بوابة أمام جامعة القاهرة.

2- حديقة الأندلس

جنب كوبري قصر النيل، أول مدخل الزمالك. تذكرة الدخول 10 جنيه بس، والكاميرا بـ 50 جنيه. لو معاك عربية ممكن تركن في جراج التحرير، وتتمشي لحد ما توصلها. أو ممكن تركن بعدها بشوية في جراج المطاعم النيلية.

3- حديقة الفنون

هتلقاها في شارع عبد العزيز آل سعود. فيها تقدر تأجر مركب لجولة في النيل. وسعرها حسب الاتفاق مع المراكبي. وهتكون مفتوحة من 8 صباحًا حتى 12 مساءً. وتذكرة الدخول 5 جنيه فقط.

4- الحديقة الدولية

تعتبر من أفضل منتزهات القاهرة. فيها كافيتريا ومنطقة ألعاب أطفال، وتقدر تاخد أكلك وشربك معاك. وتذكرتها بـ 10 جنيه للفرد. موجودة في الحي السابع مدينة نصر، شارع الدكتور محمود إبراهيم.

5- حديقة الجزيرة

ودي مش كتير يعرفها، موجودة في آخر كوبري قصر النيل، قدام دار الأوبرا. ورغم إنها صغيرة لكن موقعها مميز وعلى النيل مباشرة. فيها مدينة ألعاب للأطفال، ومرسى للمراكب النيلية. وسعر تذكرتها 5 جنيه فقط.

6- حديقة أم كلثوم

دي كمان مش كتير بيزوروها. موجودة جنب مستشفى قصر العيني. ولو انت جاي من جامعة القاهرة، بعد كوبري الجامعة هتدخل شمال بعد المسرح الفني، هتلقاها هناك. تعتبر من أفضل الحدائق المميزة. وشغالة يوميًا من 9 صباحًا حتى 11 مساءً، وهي من الحدائق الهادية ومميزة بجمال زراعاتها الطبيعية وتذكرتها فقط 5 جنيه.