The Definitive Guide to Living in the Capital , Cairo , Egypt

كلنا عارفين إن محافظة الجيزة فيها حديقة حيوان مميزة جدًا بتعتبر من أقدم حدائق الحيوان في العالم كله، لكن للأسف مش كل الناس تعرف إن الحديقة نفسها بتضم متحف حيواني رائع، بيعتبر واحد من أقدم المتاحف مش في مصر بس، ولكن في الشرق الأوسط. تم إنشاؤه في سنة 1906م.

تعالوا نعرفكم أكتر على تفاصيل المتحف المهم ده:

بيتكون المتحف من 3 أدوار، وبيضم المعروضات اللي بتتعلق بدراسة تاريخ وعلوم الحيوان، منها الهياكل العظمية النادرة والنماذج المحنطة لمختلف أصناف الطيور والزواحف والحيوانات البرية، اللي بيرجع بعضها لسنة 1910م.

المتحف بيضم كمان قاعتين مهمين، واحدة منهم بتضم مجموعة كاملة للطيور المصرية ومجموعات تانية من الزواحف والثدييات والقوارض، والمجموعات دي خاصة بالأبحاث العلمية، أما القاعة الثانية فبتُنظم دورات تدريبية للطلبة والمُهتمين بالحياة البرية على إيد متخصصين وده بهدف رفع الوعي البيئي للحفاظ على الحياه البرية.

وبيضم المتحف 1352 طائر محنط، و555 حيوان من الثدييات، و259 من الزواحف، و115 من الجماجم، و35 من الهياكل العظمية، و49 من الرؤوس، وأقدم المحنطات دي بيرجع لأكتر من 100 سنة فاتت وهو عمر حديقة الحيوان بالجيزة.