The Definitive Guide to Living in the Capital , Cairo , Egypt

من ساعات قليلة، أعلنت محافظة القاهرة إنها قربت تنتهي من مشروع ترميم وتطوير مبنى غرناطة الأثري في مصر الجديدة، اللي بيعتبر من أجمل مباني القاهرة التاريخية، وده ضمن خطة مصر لاستعادة العاصمة المصرية لتراثها المعماري المميز.

تعالوا نتعرف أكتر على تفاصيل تطوير مبنى غرناطة الأثري، ونعرف حكايته.

مساحة الأرض اللي بيشملها مشروع الترميم والتطوير بتبلغ 11 ألف متر مربع، منها 3700 متر مربع للمباني، وتكلفة المشروع الإجمالية 37.2 مليون جنيه، وعملية الترميم والتطوير بدأت في سنة 2017.

وبتشمل مراحل تطوير المبنى بحسب ما أعلنته محافظة القاهرة، تجديد شبكات الإنارة والصرف، وإعادة تصميم السور الخارجي، علشان يتماشى مع عراقة المبنى، ويسمح برؤيته من الخارج، بالإضافة لترميم القباب والصالة الداخلية للمبنى.

حكاية مبنى غرناطة

مبنى غرناطة كان زمان مكان مفضل للملك فاروق، وهناك كان بيقعد مع زواره من الوفود المختلفة سواء داخل البرج أو على مدرجات المبنى، علشان يستمتعوا بمشاهدة سباقات الخيول، وده السبب في إطلاق اسم “سبق الخيل” على الشارع الرئيسي أمام حديقة الميريلاند، لأن المكان ده كانت بتقام فيه المسابقات اللي شاركت فيها جنسيات مختلفة زي الأرمن والشركس والإنجليز، إضافة إلى السفراء والفنانين والضيوف من الدول المختلفة.

وتم تصميم مبنى غرناطة بالكامل على الطراز الأندلسي، وبيتكون من مجموعة من المدرجات بتطل على الساحة اللي كانت مخصصة لسباقات الخيول، كمان تم تزيين المبنى ببرج له سلم حلزوني، وقبة على الطراز الأندلسي.