The Definitive Guide to Living in the Capital , Cairo , Egypt

الصور: موقع وزارة السياحة والآثار المصرية

انتشرت خلال الساعات اللي فاتت شائعة عن اندلاع حريق بمتحف ركن فاروق التاريخي بحلوان، وده تسبب في قلق عند محبي الآثار والتاريخ. لكن وزارة السياحة والآثار نفت تمامًا الكلام ده، وأكدت إن المتحف سليم وآمن، وما اتعرضش لأي حريق أو أضرار من أي نوع.

الوزارة أوضحت كمان إن الحريق اللي اتكلم عنه البعض حصل في مشتل زراعي بعيد عن المتحف بمسافة بتوصل لحوالي كيلومترين، ومكانه لا علاقة له بالمتحف لا من قريب ولا من بعيد.

متحف ركن فاروق مش مجرد مبنى أثري، ده واحد من أجمل المتاحف الموجودة على ضفاف النيل في منطقة حلوان. بيحكي قصة الملك فاروق، آخر ملوك الأسرة العلوية، وبيضم مجموعة نادرة من مقتنياته الشخصية، وأثاثه، وتحف بتعكس أناقة وفخامة الحقبة دي.

النهارده، بنطمنكم إن المتحف بخير، ولسه محافظ على جماله وتاريخه، وبيستنى الزوار اللي بيحبوا يشوفوا مصر من زاوية مختلفة.. وبالمناسبة دي تعالوا نتعرف اكثر على متحف ركن فاروق!

متحف ركن فاروق، أو استراحة فاروق بحلوان شيدها الملك فاروق الأول عام 1942، علشان تكون استراحة شتوية له، والركن صمم على هيئة قارب ثابت على شاطئ نيل القاهرة، والاستراحة لها مرسى نهري خاص الهدف منه استقبال اليخوت والسفن الكبيرة.

بتضم الاستراحة كمان حديقة فيها برجولة خشبية وأكثر من 30 نوع من أشجار المانجو النادرة اللي جُلبت من ألبانيا لزراعتها بالقصور الملكية.

وبدأت فكره تحويل الاستراحة إلى متحف عام 1976، بعد ضمها إلى قطاع المتاحف بالمجلس الأعلى للآثار، وفضل المكان بيتعرض في الوقت ده للفتح والإغلاق أكثر من مرة، لحد ما تم أغلاقه بشكل كامل في سنة 2011، وده وقت اللي كانت مصر بتمر فيه بفترات سياسية عصيبة، لكن أعيد افتتاحه بعد الانتهاء من مشروع تطويره وترميمه سنة 2016.

بيضم المتحف عدد من القاعات بالإضافة إلى شرفة كبيرة وجناح للنوم، وبيُعرض داخل القاعات دي مجموعة قيمة من المقتنيات الملكية، ومنها: أثاث، تحف، تماثيل، ولوحات، بالإضافة إلى المقتنيات الملكية المنقولة من استراحة الملك فاروق بالهرم.

مواعيد الزيارة الرسمية: من 9ص إلى 5م.

العنوان: كورنيش النيل، حلوان.