The Definitive Guide to Living in the Capital , Cairo , Egypt

في ميدان المساحة وبالتحديد في 6 شارع حسين واصف، ناصية بيتزا هت، الدور التالت فيه وورك سبيس جديدة اسمها “مجال” بتوفر لك قعدة مريحة للمذاكرة والشغل والاسترخاء في هدوء تام وبمستويات مختلفة، واحنا في كايرو 360 قررنا نجرب المكان.

الهدوء هو سمة المكان، وهما بيسعوا إنهم يوفروا الراحة واحتياجاتك علشان تقدر تعمل اللي أنت جاي علشانه بدون أي تقصير، وعندهم “مساحات عمل مشتركة” علشان تخلص شغلك وكمان عندهم الغرفة الهادية، ودي الهدوء فيها قاتل ومكيفة، وتنفع للمذاكرة أو القراءة.

مجال عندهم قاعات تدريب مجهزة للتدريبات والفاعليات المختلفة، وكمان فيه قاعات اجتماعات تقدر تجتمع فيها مع فريق عملك وهما هيخدموا عليك، وفيه قاعة للجلسات الشخصية والتدريب بنظام فرد مقابل فرد، ده غير القعدة العربي التراثية للناس اللي بتحب قعدة الأرض المريحة.

وداخل الوورك سبيس فيه مساحة خاصة مخصصة للبنات فقط، وكمان فيه أماكن خارجية للجلوس، مع عدم نسيانهم للترفيه، وعندهم بلاي ستيشن وتنس طاولة علشان تلعب لما تحب تفصل، والمشروبات بتاعتهم حلوة ومش غالية، مثلًا النسكافيه بـ6 جنيه والشاي بـ4 والحاجة الساقعة بـ6 جنيه، ومفيش أكل عندهم ولكن يقدر أي حد يطلب أي حاجة من بره دليفري.

وتقدر تقعد اليوم كامل في الوورك سبيس بـ30 جنيه أو الساعة الواحدة بـ٦ جنيه مع مشروب ساخن مجانًا.، وعندهم اشتراكات سنوية وشهرية “زي المترو” علشان توفر من اللي بتدفعه.

مجال وورك سبيس لهم فرعين واحد في الدقي والتاني مدينة نصر، وقريب أكيد هننقل لكم تجربتنا من مدينة نصر زي ما جربنا فرع الدقي. وتقدروا تشوفوا صفحتهم على الفيسبوك هنا.