The Definitive Guide to Living in the Capital , Cairo , Egypt

الصورة الرئيسية من الكنيسة المعلقة

القاهرة مدينة عظيمة، فيها مباني مدهشة، وتفاصيل تاريخها مرسومة بالصور والحروف على حوائط كتير، ومن بين مباني القاهرة فيه عدد كبير من المباني التاريخية الدينية، زي المساجد والكنائس والمعابد.

وفي منطقة بحي مصر القديمة، اللي بيعتبر واحد من أهم أحياء القاهرة اللي فيها عدد كبير من المعالم الدينية، بيجتمع مسجد عمرو بن العاص مع الكنيسة المُعلّقة والمعبد اليهودي بن عزرا في مجمع واحد يُعرف بـ مجمع الأديان.

تعالوا نتعرف على 3 أماكن دينية في القاهرة يستحقوا الزيارة في الويك إند ده، والمسافة بينهم قصيرة جدًا، يعني هتقدر تزورهم كلهم في يوم واحد.

 

مسجد عمرو بن العاص

واحد من أهم معالم القاهرة الدينية، موجود في حي مصر القديمة. بيستمد مسجد عمرو بن العاص أهميته من كونه أول مسجد في إفريقيا ومنبر من منابر العلم الشرعي السابقة قبل تأسيس الأزهر بالإضافة إلى روعة وجمال تصميمه الإسلامي المُميّز من الداخل والخارج، وهناك هتحس بدرجة عالية من الروحانية والسكينة.

بُني المسجد في نفس مكان خيمة القائد الإسلامي عمرو بن العاص سنة 641م، وضم بعدها مدفن ابنه عبد الله بن عمرو بن العاص.

أفضل وقت لزيارة المسجد: من وقت صلاة العصر ولحد صلاة العشاء.

 

الكنيسة المُعلقة

واحدة من أشهر معالم السياحة في القاهرة بشكل خاص وفي مصر بشكل عام، وبتعتبر الأقدم من نوعها في القاهرة، وهي معروفة كمان باسم كنيسة مريم العذراء، وهي بترحب بالزوار من مُختلف الأديان والجنسيات.

هناك هتستمتع ببناء الكنيسة المُميّز والفريد من نوعه، وده لأنها مبنية من غير أعمدة أعلى حصن بابليون، وكمان بتحوي لوحات ونقوش ملونة رائعة بتستعرض قصص من الكتاب المُقدّس ورحلة العائلة المُقدّسة.

أفضل وقت لزيارة الكنيسة: بعد غروب الشمس.

 

المعبد اليهودي بن عزرا

بيعتبر معبد بن عزرا أقدم معبد يهودي في مصر. وكان المعبد ده مركز لكتير من الاحتفالات والتجمعات والصلوات، لكنه مابقاش بيستخدم لمناسبات دينية الفترة دي. بيعتقد البعض أن المعبد كان في يوم كنيسة قبطية أرثوذكسية تم بيعها لأفراد الجالية اليهودية في مصر سنة 882م.

تم تسمية المعبد على اسم عزرا العالم الديني والفيلسوف اليهودي.

لما تزور المعبد هتشوف البيما أو المنبر اللي كانت بتقرأ فيه الصلوات، والهيكل اللي بيمثل اتجاه الصلاة هو أقدس عنصر في المعبد اليهودي، وهو مزخرف بأسلوب الأرابيسك ومطعم بعرق اللؤلؤ في دمج للتقاليد الفنية المختلفة، أما الوصايا العشر فمكتوبة على الهيكل باللغة العبرية.

اكتشفت في المعبد ده كمية وثائق تاريخية مهولة.

أفضل وقت لزيارة المعبد: بعد الظهر.