The Definitive Guide to Living in the Capital , Cairo , Egypt

الحياة في كايرو

مشروع المريخ: عبر عن نفسك وتفاعل مع جمهورك

مشروع المريخ: عبر عن نفسك وتفاعل مع جمهورك
بواسطة
Waleed Abuarab

كل شهر بـ تنطلق فعاليات «مشروع المريخ» من مكان مختلف في كايرو، الفكرة
بسيطة لكن عبقرية؛ ميكروفون مفتوح، ومن حق أي حد يطلع ويقف قدام الجمهور ويعبر عن
نفسه، يغني أو يعزف أو يقول شعر أو يعمل ستاند آب كوميدي أو يرقص أو حتى يعرض
أفكاره وخواطره على الملأ. فكرة الميكروفون المفتوح موجودة من زمان في أماكن كثير،
لكن الجديد هنا أن «مشروع المريخ» مالوش مكان محدد، إنما كل مرة بـ تكون فعالياته
في مكان جديد في وجود نفس المشرفين عليه وأصحاب المبادرة، اللي بـ يقوموا بالتنسيق
مع إدارة المكان اللي هـ يتنظم فيه الحدث الثقافي الفني. المبادرة اللي بـ يتبناها
أصحاب الفكرة حاليًا هي فكرة القوافل الثقافية للتعبير عن النفس من خلال
الميكروفون وإحداث تفاعل بين الجمهور والمؤديين، وهدف القافلة أنها تلف كل
المحافظات وتدعم حرية الرأي والتعبير في أنحاء مصر.

حضرنا آخر عروض مشروع المريخ – اللي له لوجو ظريف عبارة عن كائن فضائي – وكان
مقام في كافيه «ليفت بانك»
في الزمالك الموجود في شارع أبو الفدا على النيل بجوار «سيكويا». والعرض اسمه
“ميكروفون المريخ”. لو العروض هـ تبدأ الساعة 7 مثلًا هـ تحتاج تكون
هناك قبل العرض بساعة أو نصف ساعة على الأقل علشان تسجل اسمك في جدول العروض،
وطبعًا كل لما تروح بدري كل ما هـ تقدم العرض بتاعك بدري. ولكل مؤدي 5 دقائق مش
أكثر أمام الجمهور. يعمل فيهم اللي هو عايزه. المسرح (واحيانًا مش بـ يكون مسرح
وإنما مجرد مساحة متوسطة في المكان) بـ يبقى مجهز بميكروفونات فقط، مافيش ميكسر
ممكن يتوصل عليه آلات موسيقية مثلًا، ومافيش أمبليفاير أو أي مكبرات صوت تانية. بس
مافيش مانع تأخذ معاك كل أدواتك وانت رايح، بس ماتنساش أن ليك 5 دقائق فقط،
والتركيب والتوصيل آخره 5 دقائق كمان.

المكان امتلأ عن آخره مع بداية العروض، وتم إخلاء الكافيه من الترابيزات
والكراسي والتف المشاهدون في شكل نصف دائرة وقعدوا على الأرض يتابعوا العروض،
ولاحظنا الإقبال الكبير من الشباب على الفكرة والتشجيع المستمر للمؤديين اللي
أغلبهم مش بـ يكون له خبرة سابقة في الوقوف أمام جمهور وبـ يبقى مرتبك، لكن صيحات
الحماس والتصفيق اللي مش بـ تتقطع بـ ترفع من الروح المعنوية للمؤديين.

تضمنت العروض في اليوم ده عدد من الفرق الموسيقية وعروض غنائية فردية
وستاند آب كوميدي وأغاني أطفال هزلية من الثمانينيات وإلقاء شعر باللغة الانجليزية
وحاجات تانية متنوعة. اللي غالب على رواد المكان والعارفين بالمشروع هو الثقافة
الغربية والتعبير باللغة الانجليزية، العروض اللي باللغة العربية كانت أقل بكثير،
والجمهور كمان كان بـ يتفاعل أكثر مع أي حد بـ يقدم العرض بتاعه بالانجليزي، لكن
ده ممكن يكون له علاقة أكثر بالمكان اللي بـ يتقدم فيه المشروع، وأكيد بـ يختلف من
مكان للثاني.

«مشروع المريخ» اتعمل قبل كده في مكتبة «بيكيا» و«درب 17 18» في الفسطاط وفي
حديقة الأزهر و«مكان» بجوار ضريح سعد زغلول و«مسرح روابط» في وسط البلد و حديقة المريلاند
في مصر الجديدة وبـ يحاول القائمون عليه تقديمه كل مرة في مكان مختلف في مناطق
بعيدة عن بعضها لضمان مشاركة ناس مختلفة كل مرة من كل أحياء العاصمة.

ممكن تتابع جدول أعمال المشروع من خلال صفحتهم على الفيسبوك أو من خلال موقعهم الألكتروني.

مقترح