The Definitive Guide to Living in the Capital , Cairo , Egypt

تطبيقات النقل الذكي بقت كتير وكل تطبيق بينافس بخدمات بيحاول فيها يكسب العميل، خاصة أن مصر سوق كبير محتاج منافسة كبيرة، ولكن للأسف التطبيقات الكتير دي 4 بس بيتنافسوا بجد في أنهم يكونوا موجودين في الصدارة! وهم أوبر وإندرايف وديدي وكريم، لكن اللي مش كتير يعرفوه إن فيه 5 تطبيقات رغم وجودها من فترة إلا أن كتير مايعرفوش عنهم حاجة لأنهم غير متواجدين إلا نادرًا سواء كدعاية أو سيارات أو حتى عملاء، وإحنا جربنا التطبيقات دي وحاولنا نوصل لعربيات ليهم وفيه اللي مالقيناش عربيات متوفرة عندهم أصلا وفيه اللي مفترض ننتظرهم 20 دقيقة على الأقل علشان نروح مشوار 15 دقيقة مثلًا.

Pink Taxi

على الرغم أنه مخصص للسيدات علشان الأمان وكل الكباتن من الجنس الناعم إلا أن وجودهم مش كبير، وهما عندهم باقات وتفاصيل كتير في خدماتهم والفكرة في بدايتها كانت مميزة ولكن من وجهة نظرنا محتاجين شغل كتير جدًا في التسويق ودراسة السوق علشان يبقوا منافسين خاصة أن خدمتهم الموجهة للبنات فقط دي ملهمش فيها منافس في مصر.

تقدروا تعرفوا أكتر عن Pink Taxi من خلال صفحة الفيسبوك من هنا.

 

taxif.com

شركة جديدة ومفترض أنها نزلت على السوشيال ميديا بعروض مميزة وحملة تسويقية كبيرة، ولكنهم نسيوا يوفروا كباتن علشان يغطوا الطلبات، وده أدى إنكم ممكن تنتظروا كتير جدًا ومش هتلاقوا عربيات أو هتلاقوها على مسافات بعيدة بتوصل لـ20 دقيقة، والحقيقة إحنا جربنا مرة الخدمة عندهم وانتظرنا وكانت تجربة مش ألطف حاجة ومكررناش، رغم أن أسعارهم اللي في التطبيق رخيصة جدًا، لكن اللي هتدفعوه بجد أغلى من أي تطبيق تاني.

تقدروا تعرفوا أكتر عنهم من خلال صفحة الفيسبوك من هنا.

WhereApp

رغم أنهم لسه جداد ولكن اعتمادهم على اليوتيوبر والبلوجر في الدعاية كبير إلا أننا لما نزلنا التطبيق علشان نجربه لمدة أسبوع معرفناش نوصل لعربية واحدة، ولكن هما بيقولوا أن تركيزهم حاليًا على الإسكندرية ولسه منطلقوش بشكل قوي في القاهرة، وأسعارهم على حسب السوق متوسطة وخلينا نقول ممكن بكرة يبقى فيه أمل.

تقدروا تعرفوا أكتر عنهم من خلال صفحة الفيسبوك من هنا.

 

علاء الدين

بيقولوا على نفسهم “سوبر آب”، لأنه تطبيق شامل بيعمل كل حاجة في أي حاجة، والحقيقة إحنا فشلنا دايمًا في طلب أي حاجة منه سواء توصيل بسيارة أو دليفري أو أي حاجة تانية، ومش عارفين المشكلة فين بس الأكيد أنه التطبيق موجود وله كويس على جوجل بلاي،  وضعيف جدًا على آبل ستور.

تقدروا تتعرفوا أكتر عنهم من خلال موقعهم الالكتروني من هنا.

 

 Ego

من التطبيقات الجديدة اللي بتحاول تزق نفسها في السوق بس لسه مانجحتش في ده، بيوعدوا بسهولة استخدام وأمان وأنهم بيهتموا بالتفاصيل ومن وقت ما نزل من كام شهر لحد كتابة السطور دي مش عارفين نطلب خدماتهم نهائي رغم تعدد المناطق، دول عاملين زي اللي بيقولوا بكرة جاي أحلى، ولسه مستنيين.

تقدروا تعرفوا أكتر عنهم من خلال موقعه الالكتروني من هنا.