The Definitive Guide to Living in the Capital , Cairo , Egypt

مش كل الناس بتقدر تسافر في الويك إند، طيب هنعمل إيه لو عاوزين نفضل في القاهرة لكن نحس أننا سافرنا المصيف بجد؟ هنعرفكم على 3 أماكن في العاصمة المصرية بيوفروا حمامات سباحة وأفكار ترفيهية مختلفة، وبسعر مناسب جدًا.

 

قرية الريف العربي

في قرية الريف العربي هتستمتع بالهواء النقي والجو الريفي بين أحضان الطبيعة، وهتستمتع بألعاب “الأكوا بارك”، وهتبلبط في 4 حمامات سباحة، ده غير الفقرات الترفيهية والحفلات على مدار اليوم للكبار والأطفال.

بتشمل وجبة الإفطار فطير مشلتت وعسل أبيض أو أسود وجبنة قريش أو قديمة وفول وفلافل وعيش ريفي وسلاطة، وبتشمل وجبة الغداء نصف دجاجة أو “مكس جريل”، أو وجبة الريف المكونة من سمانة، ربع دحاجة و2 كفتة.

هتستمتعوا هناك كمان بركوب الجِمال والخيول، وملاهي الأطفال والتصوير بالملابس التاريخية.

العنوان: الهرم، المريوطية في اتجاه طريق سقاره السياحي، الجيزة.

 

بيوت باي

مكان جميل هيساعدك على الاسترخاء في الويك إند، بيقدموا حفلات غنائية، وطبعًا عندهم حمام سباحة و”بيتش باجي” ومسابقات وألعاب مائية.

المكان بيقدم وجبات أكل شرقية وعالمية كمان.

العنوان: طريق القاهرة الإسكندرية الصحراوي.

 

قرية العزبة

قرية العزبة في المريوطية فيها حمام سباحة وبتقدم في الويك إند عروض ترفيهية منها المزمار البلدي والربابة والتخت الشرقي.

بتقدم القرية وجبة إفطار مصرية جدًا مكونة من فطير مشلتت وجبن وعسل أبيض وأسود، أما وجبة الغداء فبتتكون من مشويات فراخ وكفتة وأرز وبطاطس وسلاطات وعيش العزبة الفلاحي.

العنوان: الهرم، طريق سقارة السياحي، الجيزة.