“مصر دوت بكرة”: مهرجان لعشاق وصناع الأفلام
Omar Mossad
في مجالات كده تحس فيها أن الدنيا ماشية في كواكب منفصلة.. ناس عايشة في عوالم مختلفة تمام الاختلاف في الاهتمامات والأهداف ومستوى التحديات وطبيعتها، رغم أنهم شكليًا بينتموا لنفس الدايرة الوظيفية وبيجمعهم مجال واحد.. الفن مثلًا واحد من المجالات دي، جزر منفصلة من الناس وكل مجموعة بتدور في فلك جزيرتها وبس.. ومن هنا بينشأ احتياج حقيقي لحد يبدأ يمد جسور موصلة بين الجزر دي علشان يلتئم شمل المجال، والناس تشوف بعضها، والفوايد تروح وتيجي بين كل جزيرة والتانية، ويحصل التكامل المطلوب، والدنيا تبقى أحسن في المجال بشكل عام.
مهرجان “مصر دوت بكرة” للأفلام القصيرة كان واحد من المبادرات اللي قررت تلعب دور الحد اللي بيمد الجسور دي.. كل المبدعين اللي بينتجوا أفلامهم القصيرة وبيدوروا على جهة ما علشان تكون الحلقة الوسيطة بينهم وبين الجمهور، بيكون عندهم فرصة للمشاركة في المهرجان بعد تقييمات الجمهور لأعمالهم والتصفية منهم واختيار الأفضل للمشاركة في أيام العروض، وفي أيام العروض بتبدأ مرحلة أخرى من التقييمات المفتوحة والنقاشات العامة من المتابعين والنقاد لاختيار أكثر الأفلام جودةً وإبداعًا ومنح المراكز الأولى جوائز مادية واعتبارية.
المهرجان السنة دي هيستضيفه مسرح الفلكي في حرم الجامعة الأمريكية بميدان التحرير ابتداءً من النهارده (الخميس 4 مايو)، وهيستمر على مدار ثلاثة أيام علشان ينتهي يوم السبت 6 مايو.. اليوم الأول (الخميس) هتبدأ فعالياته في تمام الخامسة مساءً، وهيكون متقسم لبلوكين زمنيين، كل بلوك هيتعرض فيه مجموعة من الأفلام بشكل متتابع، هيبدأ البلوك الأول في تمام الخامسة مساءً وينتهي في تمام السادسة والنصف مساءً، ويبدأ البلوك التاني في تمام السابعة مساءً وينتهي في تمام الثامنة والنصف مساءً.
اليوم التاني (الجمعة) هيكون متقسم لأربع بلوكات، هيبدأ أولها في تمام الواحدة ظهرًا، وهينتهي آخرها في تمام الثامنة والنصف مساءً.. وكل بلوك هيبقى مدته ساعة ونصف متصلة من العروض.
أما آخر الأيام فهيبقى متقسم لتلات بلوكات.. يبدأ أولها في تمام الواحدة ظهرًا، وينتهي آخرها في تمام السادسة والنصف مساءً، ويتم اختتام المهرجان بحفل اختيار الأفلام الفائزة اللي هيكون في نفس اليوم وهيبدأ في تمام السابعة مساءً وينتهي في تمام التاسعة مساءً.
حضور العروض بيكون مفتوح للجمهور بشكل مجاني وبدون تذاكر.. لكن للدواعي التنظيمية بيتم الحضور بعد التسجيل أونلاين على الموقع الخاص بالمهرجان من خلال ملء البيانات المطلوبة في النموذج الموجود من هنا.
يذكر أنه المهرجان هيحضر فيه بعض النقاد أصحاب الثقل الفني والجماهيري علشان يكتسب المهرجان قيمة إضافية بالمناقشات الحية الثلاثية بين الجمهور النقاد وصناع الأفلام.
جدول فعاليات الأيام الثلاثة هتلاقوه موجود على الموقع الإلكتروني من هنا.. وتقدروا تبصوا عليه برضه على صفحة فيسبوك الخاصة بالمهرجان من هنا.
ولو حابين تعرفوا تفاصيل أكتر عن الأفلام المعروضة تقدروا تاخدوا جولة سريعة في التعريف بيها على الموقع الإلكتروني من هنا.
أي تفاصيل تانية هتحتاجوا تعرفوها سواء عن الحجز أو عن الأفلام المعروضة تقدروا تعرفوها من خلال التواصل مع القائمين على المبادرة على صفحة الفيسبوك أو الموقع الإلكتروني اللي سبق الإشارة ليهم أكتر من مرة في المقال.
نتمنى لكم مشاهدة سعيدة، وتجربة قيمة ومفيدة.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
