The Definitive Guide to Living in the Capital , Cairo , Egypt

عام 2016 بدأت شركة “مصر كاب” نشاطها التجاري علشان تنضم لمستخدمي التكنولجيا للنقل الجماعي في مصر، وده من خلال انطلاق أول تطبيق لها لنقل الركاب داخل مصر، والشركة دي بتعتمد على سيارات بأنواع مختلفة ومعايير جودة بتحافظ على أمنك الشخصي أولًا وأخيرًا على حد تعبيرهم.

الشركة بتقول على نفسها على موقعها الرسمي إنه بمبدأ المصداقية والإحترام والشفافية بتسعى الشركة إنها تغطي كل محافظات مصر بالمشاركة مع شركات خدمات ليموزين وسياحة، علشان توفر سيارات مميزة تكون نجاح جديد لها، وعندهم برامج قوية للكباتن العاملين للتطوير المهني والشخصي ضمانًا لرضاء العميل، وفي حالة أنه أي عميل اشتكى من كابتن بيتم التحقيق فورًا وكمان لو اتكررت الشكوى الكابتن بيدخل مرحلة إعادة تأهيل وبيدربوه من جديد.

الحجز على “مصر كاب” سهل، كل اللي محتاجه إنك تفتح التطبيق وتحدد مكان وجودك والمكان اللي هتروح له وبتدور على سيارة، وللأسف مش هتلاقى أي سيارات لهم إلا في مدينة نصر والتجمع حتى الآن، وكمان ممكن تطلب من خلال الموقع بنفس الطريقة، ونظام المحاسبة بيكون إما عن طريق الكاش أو البطاقات البنكية، وفيه برامج مختلفة للعملاء الدائمين بتوفر لهم في الوقت والفلوس.

أما أنواع السيارات في “مصر كاب” فهي مختلفة وبتعتمد على 4 مستويات.. “تاكسي أسود X أصفر”، تاكسي ستار وده لونه أخضر، وسيمي بزنس “أزرق”، وأخيرًا للسيدات والأطفال فقط “بينك كاب”، وكافة المستويات سيارات حديثة من 2012 حتى 2018، والمفروض إن حالتها جيدة.

أما نظام المحاسبة فبيكون على حسب الخدمة المطلوبة، فالتاكسي الأصفر بيكون الحد الأدنى له 7 جنيهات، وبيتم بدأ الأجرة بـ5 جنيه، وبيحاسب العميل على كل كيلو بـ1.75 جنيه، ودقيقة الإنتظار 0.25 قرش، وأما سيمي بزنس وتاكسي ستار فأقل أجرة لهم 10 جنيهات، وتعريفة الكيلو 2 جنيه، والإنتظار بيتم احتساب كل دقيقة بـ 0.35 قرش، ويختلف بدء الرحلة بأن سيمي بزنس 5 جنيهات والتاكسي الأصفر بـ5.50 جنيه.

أما البينك كاب، والمخصص للسيدات والأطفال فقط فأقل أجرة يتم تحصيلها هي 10 جنيهات، وتبدأ التعريفة بـ6 جنيهات لبدأ الرحلة، وبيحاسب كل كيلو بسعر 1.75 قرش، ودقيقة الانتظار بـ 0.25 قرش.

وعلى سبيل المثال فإن متوسط سعر رحلة من وسط القاهرة حتى مصر الجديدة تتكلف 35 جنيه قابلة للزيادة أو النقصان حسب الحالة المرورية.

 وتقدر تحمل التطبيق لهواتف الأندرويد من هنا

ولنظام تشغيل IOS من هنا