The Definitive Guide to Living in the Capital , Cairo , Egypt

الصور: ويكيبيديا

الجمالية مش مجرد حي في القاهرة، ده عالم كامل ومتحف مفتوح فيه أهم مباني في القاهرة من وقت بنائها. فيه الأزهر، وجامع الحاكم بأمر الله، والجامع الأقمر وغيرها من المباني العظيمة اللي مالهاش مثيل في العالم. الحي فيه كمان أسوار القاهرة، وبواباتها، والمدارس الأيوبية والمملوكية، وخان الخليلي، والصاغة، والنحاسين، وأكتر.

تعالوا نتعرف على 7 معلومات تاريخية عن حي الجمالية.

 

1- منطقة الجمالية فيها قصر الغوري واللي اتبنى في عهد قانصوه الغوري سنة 1504.

2- كمان المنطقة بتضم حارات مهمة زي “الحكاكين” ودى زمان كانوا بيصنعوا فيها الكحك، وحارة “الزيت” اللي بتجمع كل تجار الزيت، وحارة الخيامية المشهورة بجودة منتجاتها وألوانها المميزة، وده غير الصاغة والنحاسين.

3- أقدم محل طرابيش موجود في الجمالية، وتقريبًا هو الوحيد اللي لسه موجود حتى الآن في المحروسة، وهو موجود جنب قصر الغوري.

4- المنطقة بتضم بين جدرانها جامع الفكهاني وسبيل محمد علي وجامع المؤيد شيخ، وجامع الحاكم بأمر الله، والجامع الأقمر، والمدارس الأيوبية والمملوكية والأزهر الشريف.

5- بيضم الحي باب زويلة اللي اتعدم عليه مجموعة من جيش التتار على يد السلطان قطز، وكمان أعدم عليبه طومان باي آخر سلطان المماليك.

6- أشهر مكان عالمي في حي الجمالية هي خان الخليلي، اللي بيزوره كل رواد المنطقة سواء للتمشية في رحاب آل البيت أو لشراء الهدايا والجلوس على المقاهي الشهيرة هناك زي الفيشاوي والعهد وغيرهم.

7- الجمالية خرح منها مفكرين وأدباء من أبناء مصر وكان على رأسهم الأديب العالمي “نجيب محفوظ” واللي ألف كتير من رواياته وقصصة على قهاويها وبين جدران مباني الحي العظيم.