The Definitive Guide to Living in the Capital , Cairo , Egypt

مصدر الصورة الرئيسية

الشوارع كلها حواديت، يادوب الإسم متغير، شارع يوديك هناك وشارع يجيبك هنا، وورا كل إسم شارع قصة وحدوتة تاريخية. تعالوا نتعرف على أسباب تسمية 5 شوارع وأحياء مهمة في القاهرة، علشان تقدروا تتعرفوا أكتر على تراثها وقصصها.

 

الزمالك

من أرقى مناطق القاهرة، واتبنت سنة 1830 لما محمد علي باشا بنى قصر بين المزارع شمال أرض الجزيرة الكبيرة علشان تكون مكان للنزهة، وقريب منها كان فيه أخصاص وعشش عاشوا فيها حاشية القصر، وعلشان كده سميت الزمالك اللي هي في الأصل كلمة ألبانية معناها العشش المصنوعة من البوص و القش.

 

الأزبكية

هي المنطقة اللي واقعة ما بين رمسيس وبولاق أبو العلا، وفي عهد محمد علي باشا كانت الشوارع بتتسمى بأسماء القبائل، واتسمى شارع الأزبكية نسبة لـ”الأتابك أزبك بن ططخ”، وكانت منطقة مش مؤهلة تمامًا للسكن، وهو بدء تعميرها سنة 1465 وحفر مجرى من الخليج الناصري علشان يوصل المياه لأرض الأزبكية، وده شجع الأهالي أنهم يبنو ويعيشوا فيها، وبقت الأزبكية شارع محوري ورئيسي في عصرنا الحالي.

الجيزة

من أشهر المناطق في القاهرة الكبرى، واتسمت بالجيزة بعد ما فتح عمرو بن العاص حصن بابليون على شاطئ النيل الشرقي، المسلمون اجتازوا النيل علشان يحرسوا الجهة المقابلة للحصن فسميت من وقتها “الجيزة”.

 

الميرغني

من أهم شوارع منطقة مصر الجديدة، وقصة تسميته كانت نسبة إلى الزعيم السوداني علي الميرغني، واللي كان هاجر من السودان إلى مصر، وأقيم في المنطقة مع عمه محمد سر الختم، وانتسب للأزهر ودرس العلوم الإسلامية، وتزعم المعارضة ضد حكم المهدية في السودان مع مجموعة من التجار والضباط، وترأس الوفد السوداني اللي سافر لتهنئة بريطانيا على فوزها بالحرب العالمية الأولى، وعرض عليه الرئيس الراحل محمد نجيب أنه يرأس اتحاد مصر والسودان فرفض وطلب أن تستقل بلده لفترة وبعدين يرجع يعمل الاتحاد.

 

كلوت بك

شارع مهم يبدأ من ميدان رمسيس ويصل حتى ميدان العتبة، وسمي على اسم الطبيب الفرنسي “كلوت بك”، اللي أختار أنه يسكن فيه مع جنوده، ووقتها كان من أهم أسواق الغلال والحبوب، وكمان كان اشتهر في فترة بشارع “البغاء” لأن بيوت البغاء المرخصة كانت موجودة فيه لحد ما انتهى الحال دا في 1945 بعد قرار الحكومة بتجريم ممارسة البغاء وقفل البيوت.