The Definitive Guide to Living in the Capital , Cairo , Egypt

الموبايل بقى أساس الحياة دلوقتي، وبقينا بنستخدمه في كل حاجة، خاصة بعد التطور التكنولوجي والرقمي الرهيب اللي شهده العالم، وأهم حاجة بنحتاج ليها في الموبايل هي الكاميرا، لأننا بنحب نوثق كل لحظة، وعلشان كده جبنالكم النهاردة نصائح من المصور الحر حسن عصام لقراء كايرو 360 علشان يعرفكم إزاي تاخدوا صورة حلوة وتعملوا لها تحرير “إديت” محترف كمان.

حسن بينصح القراء دايمًا بأنه ممنوع استخدام الفلاش، وكمان الزووم لأنهم بيقللوا الكواليتي، وبينصح أنكم تتحركوا بجسمكم للحاجة اللي عاوزين تصوروها، وممنوع انكم تصوروا في بقعة ضوئية زي الشمس، علشان بتضيع السينسور والصورة بتطلع متعبة للعين.

حسن بينصح أنكم لازم تشغلوا خاصية grid lines من الكاميرا، علشان تقدروا لو أنتم مهتمين بتصوير الأشخاص لازم تحددوا صورة الشخص بناءًا على خطوط تقسيم الشاشة، وأن نهاية الكادر لازم تكون مع الخطوط لأنه ميصحش تصوروا حد وتخلوا أطرافه مقطعة وشكلها مش كويس، وكمان لو هتصوروا لاند سكيب أو شخص من مسافة بعيدة، فهتحتاجوا أنك تهتموا بخطوط التقسيم دي، لأنكم هتتبعوا من خلالها قاعدة اقسيم الصورة لـ”التلت والتلتين”، ودي علشان تطلعوا صورة صح وباحترافية.

أهم ما في التصوير هي الإضاءة، ولو أنتم بتصوروا شخص فلازم مصدر الضوء يكون ورا الكاميرا، علشان توزيع الإضاءة يكون كويس ويتوزع صح في الصورة، والثقة، لأن التصوير طبقًا لنصائح حسن ثقة في النفس أكتر من أي حاجة تانية.

وكمان بيقول حسن عصام، أنكم ممكن تستعينوا -بتطبيق فيه وضع المانيوال لكاميرات الموبايل اسمه Camera fv-5 وبيتباع على جوجل بلاي بسعر 29 جنيه، ومن خلاله هتعرفوا تتحكموا في مثلث التعريض، وهيقلل الإيزو، وهتتحكموا في الشاتر، والإضاءة الداخلية للصورة بنسبة كويسة، ولما تتعودوا عليه هتقدروا تلعبوا بالصور براحتكم فيه وهتطلعوا أحسن حاجة عندكم.

صورة توضح من خلال الـGridlines خطأ تحديد التلت والتلتين

وعلشان تعملوا  إديت لصوركم من الموبايل فأنتم محتاجين يكون عندكم برنامج بروفيشنال، وتقدروا تحملوا Adobe Lightroom للموبايل وده مجاني، ولازم تخلوا بالكم ان الإيديت ممكن يغير الصورة بنسبة 70%، وعلشان تتعلموا إزاي تشتغلوا عليه مع تطبيق Camera Fv-5 تقدروا تدخلوا على اليوتيوب وتعرفوا تفاصيل وأسرار أكتر عن البرامج دي.