The Definitive Guide to Living in the Capital , Cairo , Egypt

يمنى أحمد

الصورة الرئيسية: Mohamad Sameh

 

القاهرة مدينة عتيقة، كل ركن فيها بيحوي تاريخ حقيقي، هتلاقوا فيها كل حاجة تتخيلوها. والعاصمة المصرية بتتميز بوجود عدد كبير من الأسواق، منها الحديث، ومنها التاريخي، وفي أسواق القاهرة القديمة هتلاقوا منتجات بتعبر عن مصر وفنها وعادات أهلها. اخترنا لكم 5 أسواق تاريخية مميزة، هتلاقوا فيها منتجات مصرية جدًا. تعالوا نبدأ الرحلة.

 

خان الخليلي

وده بيكون فيه كل التحف والأنتيكات اللي ممكن تتخيلها، وقطع مصغرة مستنسخة من أجمل تماثيل مصر القديمة. الجو بتاع الشارع نفسه ممتع وبيدخلك في عالم مليان بهجة.

 

الغورية

وده موجود في شارع الأزهر، ومتوفر فيه كل أنواع الأقمشة والستائر والمفارش، وكمان بأسعار بسيطة وفيه جملة وقطاعي.

 

سوق النحاسين

وهو سوق موجود في شارع المعز، مشهور بتصنيع الأواني النحاسية المصنعة على أيدي العمال في مهنة النحاس. هو صحيح السوق قرب يندثر بسبب قلة الإقبال عليه، لكن معروضاته جميلة ولسه فيه ناس بتيتخدمها.

 

سور الأزبكية

وده موجود جنب مترو العتبة، فيه كل الكتب النادرة والمجلات القديمة اللي موجودة من قرن فات، ده المكان المفضل لعشاق الكتب وبيتميز بأسعاره الرخيصة وفيه كتب مستعملة.

 

سوق الإمام الشافعي

وده بيكون موجود يوم الجمعة (علشان كدة اسمه سوق الجمعة) عند ضريح الإمام الشافعي بمنطقة القلعة، فيه شوارع كتير وحواري متفرقة، فيه بيتباع الكلاب والقطط والعصافير وأسعاره كويسة.