The Definitive Guide to Living in the Capital , Cairo , Egypt

الصورة الرئيسية: Bruno Kelzer

الفترة دي، الأسواق في مصر بتشهد حالة جنون في كل حاجة، سواء كانت الأسعار أو المنتجات أو عدم إصدار فواتير أو غش تجاري وغيرها، وعلشان تتأكد إن مافيش حد بينصب عليك، هنعرفك طرق تقديم شكوى لجهاز حماية المستهلك للحصول على حقك.

أولًا، جهاز حماية المستهلك هو الجهة الرقابية الرسمية لحماية المستهلك في مصر وتم تأسيسه عام 2006، وهو الوكيل للمستهلك ضد التاجر للحصول على حقه القانوني “إن وجد”، وده في أكثر من مجال زي توافر البيانات والصحة والسلامة والاختيار الحر والكرامة الشخصية وأفرع كتير شاملة تحت راية “حماية المستهلك” من التجار، وده عن طرق الشكوى ومحاولة الحل الودي ولكن لو الحل الودي ماكنش فيه نتيجة بتوصل المشكلة لقضية وكمان بيقدروا يستعينوا بخبراء في الصحة والغذاء والصناعة وغيرهم علشان يحصلوا على حق المستهلك.

وحدد جهاز حماية المستهلك المصري مجموعة متطلبات أساسية علشان تقدروا تقدموا شكوى رسمية، أولها البيانات الرسمية للشاكي وصورة الرقم القومي والفاتورة اللي مهم جدًا أنكم تشتروا بيها لأنها الإثبات الوحيد للشراء رسميًا، وكمان الضمان “إن وجد”، ولو شكوتكم بخصوص السلع المعمرة فبتضيفوا عليها إيصالات الإصلاح وإيصال استلام المنتج موضحًا حالته قبل التسليم، ولو شكوى من سيارة فبيتم إرفاق الرخصة وايصالات الصيانة وتقرير فني “إن وجد”، وفي الحالات اللي زي دي جهاز حماية المستهلك بيقدر يستعين بلجنة من وزارة الصناعة أو كلية الهندسة.

أما شكاوي أجهزة الهاتف المحمول فلازم يكون عندكم ايصال تسليم الجهاز للتوكيل وده على الأقل لازم تصوروه بالموبايل لو التوكيل هياخده علشان ده حقكم، وبخصوص شكاوي الطاقة والمرافق بتقدموا فاتورة الاستهلاك الخاصة بكم، وشكاوي الإنترنت والاتصالات فبترفقوا رقم الشكوى وحالتها تبعًا للشركة الخاصة بكم، ورقم الهاتف سواء أرضي أو موبايل ولو فيه فاتورة استهلاك مع العلم أن الشكاوي دي بتتحول للجهاز القومي لتنظيم الاتصالات.

كمان دلوقتي أصبح بامكانكم الشكوى في حالات “التجارة الإلكترونية” وهي حالات الشراء أونلاين وبيكون مرفق مع الشكوى صورة الطلب للمنتج مع إيصال الشحن، ده غير كمان شكاوي العقارات اللي من حقكم تشتكوا في أكتر من مجال فيها زي “الأسانسير – الأثاث – التشطيبات – المطابخ”، ولازم يكون مرفق عقد الاتفاق ضمن الشكوى.

جهاز حماية المستهلك له 24 فرع في محافظات مصر وتقدروا تقدموا الشكوى من خلال الرقم المختصر 19588، أو من خلال رقم الموقع الإلكتروني من هنا، وصفحة الفيسبوك من هنا، أو من خلال واتس آب رقم 01000000329.