The Definitive Guide to Living in the Capital , Cairo , Egypt

يمنى أحمد

كتير مننا بيحب الأماكن المرتفعة جدًا، بيحبوا يشوفوا كل حاجة من فوق علشان دائمًا بتكون مختلفة حتى لو مش واضحة قوي. في القاهرة أماكن كتيرة عالية جدًا، بنحب نروحها علشان نشوف جمال القاهرة من فوق، إزاي فيه مدينة حلوة بالشكل ده رغم الزحمة!

في كايرو 360 حبينا نرصد لكم أعلى 13 مبنى في القاهرة، والمباني دي مش بس عالية.. هيا بتتميز بجمال شكلها الخارجي وكمان قيمتها التاريخية. يلا نشوف السطور الجايه بتقول إيه.

 

(1) البرج الأيقوني بالعاصمة الإدارية الجديدة: وده برج انتهى بنائه وهيتم افتتاحه رسميًا قريبًا، يرتفع 385 متر عن سطح الأرض ومصنف إنه يكون أطول برج في مصر وإفريقيا.

 

(2) برج القاهرة: وهو أعلى مكان في القاهرة ويطلق عليه كمان برج الجزيرة، موجود في منطقة الأوبرا في وسط البلد وبيطل على النيل، طوله 178 متر، وهو من أبرز معالم القاهرة، تقدر تشوف من فوقه الأهرامات وقلعة صلاح الدين وغيرها.

 

(3) مبنى وزارة الخارجية المصرية: وهو مبنى عملاق نفذته شركة المقاولون العرب، وطوله 13 متر، بيتكون كمان من 6 طوابق تحت الأرض و39 طابق فوق الأرض.

 

(4) فندق جراند نايل تاور: وهو فندق يعتبر من أفخم فنادق القاهرة وأعلاها، له هيئة خاصة بيه مميزة ده غير إنه بيطل على النيل علطول.

(5) برجي نايل سيتي أوراسكوم الجنوبي والشمالي: بتتكون أبراج نايل سيتي من 3 أبراج من أطول مباني القاهرة، وهم: برج نايل سيتي الجنوبي بطول 142 متر، واللي بيتكون من 34 دور، وبرج نايل سيتي الشمالي اللي طوله 142 متر، وبيتكون من 34 دور، وفندق فيرمونت القاهرة بطول 100 متر.

(6) برج البنك الأهلي: وده موجود على النيل من الناحية المقابلة لجزيرة الزمالك، ويبلغ ارتفاعه 135 متر، ويعتبر من معالم القاهرة المميزة.

 

(7) فندق فور سيزونز القاهرة نايل بلازا: وده موجود على النيل في حي جارن سيتي، ويبلغ طوله 127 متر، ويعتبر من أفخم فنادق القاهرة.

 

(8) أبراج المعادي السكنية: ودي موجودة على كورنيش المعادي وبيتراوح طولها بين 122متر و 98 متر، وبتتميز بإطلالة مختلفة.

 

(9) رمسيس هيلتون: وده بيعتبر من أهم الفنادق في القاهرة، واللي بيطل مباشرة على ميدان عبد المنعم رياض ويتكون من 36 طابق فوق الأرض، وطوله 110 متر.

 

(10) مبنى الإذاعة والتليفزيون (ماسبيرو): وده موجود في منطقة ماسبيرو على نيل القاهرة، يبلغ ارتفاعه حوالي 100 متر، وتقدر تشوفه بوضوح من برج القاهرة.

(11) قلعة صلاح الدين الأيوبي: يبلغ ارتفاع سورها حوالي 84 متر، وهو سور أفقي غير منتظم الشكل، موجودة بمنطقة السيدة عائشة، وكاشفة للقاهرة كلها من فوق.

 

(12) فندق سوفيتيل القاهرة الجزيرة: وده بيطل على النيل مباشرة ويبلغ ارتفاعه حوالي 100 متر.

 

(13) أبراج وزارة المالية: ودي يبلغ طولها حوالي 60 متر، وبتطل على كوبري 6 أكتوبر.