The Definitive Guide to Living in the Capital , Cairo , Egypt

يمنى أحمد

القاهرة مليانة بالعجائب والغرائب، فيها كتير من الأماكن الممتعة الغريبة اللي بتحسسك إن لسه فيه تجارب عجيبة في الحياة تستحق إنها تتعاش. كايرو 360 لسه بتحتفل معاكم بمرور 13 سنة على انطلاقها في العاصمة، علشان كده في السطور الجايه هنقول لكم على أغرب 13 مكان ممكن تزوروه في القاهرة.

 

متحف الأوهام:

وده موجود في طريق القاهرة الإسكندرية الصحراوي، تحديدًا عند الكيلو 38، وبيتم فيه خداع الحواس بشكل يسحرك. يعني ممكن تمشي في البيسين من غير ما تتبل، أو تقف على راسك في غرفة دوارة، زي ما تحب هتستمتع ومواعيده كل يوم من الساعة 10 صباحًا حتى الساعة 10 مساءً.

بلورة في مياة النيل:

وأنت ماشي على الكورنيش هتلاحظ بلورة بتجري على وش المياة وفيها أشخاص، ده نشاط في القاهرة معمول علشان اكتشاف النيل بشكل أسهل.. لكنه ممكن يكون مخيف شوية وغريب.

متحف جاير أندرسون:

وهو كان في الأول اسمه بيت الكريتلية، لكن جه رائد بيخدم في الجيش البريطاني اسمه جاير أندرسون وسافر حوالين العالم، كل أما يلاقي قطعة أثرية تعجبه يشتريها ويحطها في البيت ده. علشان كده المكان من أغرب الأماكن اللي ممكن تشوفها في القاهرة لكنه ممتع وجميل.

 

مطعم Dans le Noir ?:

وهو أول مطعم مظلم في القاهرة، المكان هناك مختلف تمامًا عن أي تجربة تانية في أي مطعم. المطعم مافيهوش منيو ومافيهوش أي إضاءة خالص والجايد كمان من ذوي الهمم المكفوفين، المكان ممتع جربوا تروحوه .

 

مقياس النيل بالروضة:

وده مقياس كانوا بيقيسوا به مستوى الفيضان زمان، موجود في الروضة بالمنيل وهو عبارة عن عمود رخامي مثمن الشكل وطوله 19 ذراع. بيعتبر من أغرب الأماكن اللي موجودة في القاهرة، لكن زيارته بتسحبك للماضي وبتخليك تتخيل إزاي كانوا بيقيسوا بيه المياه.

 

بيت الرزاز:

وده موجود في الدرب الأحمر بين باب الوزير وسوق السلاح، المفروض إنه كان بيت واحد تم بناءه في القرن الخامس عشر، ولكن انضم ليه جزء تاني في القرن الثامن عشر، وهو من أهم البيوت الأثرية في القاهرة.

 

قصر البارون إمبان:

وده القصر اللي شيده المليونير البلچيكي البارون إمبان بعد ما استقر في مصر. القصر شديد التميز ومصمم على الطراز الهندوسي، وطلعت إشاعات فترة بتقول إنه مسكون، لمن الناس طلعت عليه الحكايات دي بس لأنه تعرض للإهمال فترة قبل ما تعيد الحكومة المصرية ترميمه في 2017.

قصر الدوبارة:

وهو قصر موجود في حي جاردن سيتي بالقاهرة، كانت عايشة فيه الأميرة أميمة بنت إلهامي بن عباس حلمي الأول، اتحول فترة لمدرسة تجريبية، لكنه أثري وبيتميز بجمال العمارة الإيطالية. هو مكان غريب والأغرب إن ده المكان اللي اللورد كرومر كان عايش فيه في مصر وماكانش عايز يسيبه.

 

الغابة المتحجرة:

ودي موجودة في القاهرة على بعد 18 كيلو من شرق المعادي، موجود فيها نباتات متحجرة وأشجار من حوالي 35 مليون سنة، لكنها بقت مصنفة بإنها محمية طبيعية من عام 1989، هيا من أغرب الأماكن اللي موجودة في القاهرة لكن ممتعة جدًا.

 

كهف الملح:

وده موجود في مصر الجديدة، هو مش غريب علشان اسمه، لكن هو كهف فعلًا بس بدل الرمل ملح، ليساعد على الاستشفاء من الألم النفسي وآلام العظام وبيديك طاقة غريبة.

 

قصر شامبليون:

وده موجود في وسط البلد، الغريب في القصر إن مفيش أي مصدر إضاءة ليه غير ضوء الشمس اللي بيدخل من كسور شبابيك القصر، وفيه نزاع عليه بين رجل أعمال ووزارة الأثار.

 

دير سمعان الخراز:

وده دير موجود في قلب جبل المقطم بعد عزبة الزبالين، فيه ألعاب كتير، هتحبه لو كنت من عشاق المغامرة وتسلق الجبال والشعلقة في الهوا.

 

مدينة الموتى:

ودي موجودة في المقطم، كانت عبارة عن مقابر بس لكن حاليًا هيا مأهولة بالسكان، هيا مش مزار سياحي لكن فيه كتير من الناس بيروحوا، وفيها سكان بعدد حوالي 500,000 نسمة، وكمان بيطلق عليها القرافة.