The Definitive Guide to Living in the Capital , Cairo , Egypt

لو بتركب تاكسي من وسط القاهرة للقاهرة الجديدة فأكيد بتدفع مبلغ كبير جدًا كل مرة، لكن من النهارده عندك بديل جديد هيخليك توفر في الميزانية، وهو أتوبيس “X-Bus” الكهربائي اللي أعلنت شركة مواصلات مصر المتخصصة في مجال النقل الجماعي عن بدء تشغيله في شوارع القاهرة في خط عبد المنعم رياض- القاهرة الجديدة.

وبحسب بيان للشركة، إطلاق الأتوبيس ده تم بعد تحالف بتقوده الهيئة العربية للتصنيع، وبتشارك فيه عدة شركات أبرزها مواصلات مصر وإيزي موبيلتي لتقنيات وبرمجيات النقل العام وفوري لتكنولوجيا المدفوعات الإلكترونية، وبالتعاون مع أورانج للاتصالات، والشركة المصرية لخدمات التتبع وتكنولوجيا المعلومات وشركة فايبر مصر.

البيان أكد إن الأتوبيس الكهربائي، اللي بيضم 44 كرسي، بينطلق الساعة 7 ونصف صباحًا من ميدان عبد المنعم رياض وبعدها بيتوقف في أربع محطات رئيسية وهي شارع رمسيس ثم ميدان العباسية وصولًا لشارع التسعين ثم الجامعة الأمريكية وبتنتهى رحلته عند محطة اللوتس بالتجمع الخامس، وبتوصل سعر تذكرته لو معاكم الكارت الذكي “مواصلاتي” 18 جنيه، ولو خارج الكارت 25 جنيه.

والميعاد التالي للأتوبيس هو 10 ونصف صباحًا.

وأكدت مواصلات مصر سعيها لتفعيل خطوط جديدة خلال الشهور القليلة الجاية للتسهيل على الركاب.

وبتقول الشركة إن عندها إستراتيجية طموحة لسنة 2022 لتعميم الأتوبيسات الكهربائية في القاهرة، بعد إعلان كل المصانع حوالين العالم عن خطتها للتوقف عن إنتاج الأتوبيسات اللي بتشتغل بالديزل في عام 2037 علشان يحل محلها الأتوبيسات الكهربائية بشكل كامل.