The Definitive Guide to Living in the Capital , Cairo , Egypt

ليل القاهرة مليان حفلات وسهرات مالهاش آخر، وكلها بتختلف باختلاف الأذواق. علشان كده هتلاقي دايمًا اللي بتحبه وبتفضله، وإحنا في كايرو 360 جمعنا شوية حفلات مميزة، من النهارده لحد آخر الشهر. لازم تروحوا وتنبسطوا فيها. يلا نعرفهم:

محمد سامي في مكان – 22 أغسطس

محمد سامي هو عازف كمان ومؤلف موسيقي مصري. شارك في تأسيس عدد من الفرق في مصر، منها فرقة “الدور الأول”. وفي مكان هيقدم مجموعة من المقطوعات الموسيقية المميزة، من أعماله. سعر التذكرة: 30 جنيه.

 

خالد سليم في محكى القلعة – 23 أغسطس

الفنان خالد سليم هيحيي حفلة محكى القلعة، في قلعة صلاح الدين. وقبله هيكون في حفلة لفرقة سداسي شرارة. سعر التذكرة: 5 جنيه.

 

على الحجار وفرقة الوزيري – 24 أغسطس

في محكى القلعة هيكون الفنان علي الحجار هو نجم الحفلة، يوم الخميس 24 أغسطس. في قلعة صلاح الدين. وسعر التذكرة: 5 جنيه.

وعلى مسرح الضمة في عابدين، هيكون في حفلة لفرقة الوزيري الاسمعلاوية. والفرقة هتقدم مجموعة من الأغاني الشعبية على آلة السمسمية. سعر التذكرة: 30 جنيه.

 

هشام عباس في محكى القلعة – 25 أغسطس

الفنان هشام عباس هو نجم المحكى يوم الجمعة 25 أغسطس. وسعر التذكرة: 5 جنيه.

 

مدحت صالح ونسمة عبد العزيز في محكى القلعة – 26 أغسطس

الفنانة نسمة عبد العزيز هتقدم عرض موسيقى مميز كالعادة، على مسرح قلعة صلاح الدين. وبعدها هتكون في حفلة للفنان مدحت صالح. هيقدم فيها مجموعة من أجدد وأجمل أغانيه. سعر التذكرة: 5 جنيه.

 

فبريكة باند في جرامافون – 27 أغسطس

فرقة “فبريكة باند” بتقدم أغاني عربية، بألحان وموسيقى غربية. وبتحاول من خلال الأغاني، محاربة الفساد في المجتمع. الفرقة هتكون على مسرح جرامافون. وسعر التذكرة: 30 جنيه.

 

المولوية ونهى فكري – 31 أغسطس

فرقة المولوية المصرية، هي فرقة بتهتم بالرقص الصوفي والإنشاد. الفرقة هتقدم حفلة على مسرح النهر في ساقية الصاوي. سعر التذكرة: 45 – 50 جنيه.

أما عشاق الجاز، فميعادهم مع حفلة خاصة هتحييها الفنانة نهى فكري، في رووم آرت سبيس. وهيكون معاها رامي عطاالله وإيهاب بدر. سعر التذكرة: 50 جنيه.

يلا ارفعوا شعار الفرفشة، وماتخلوش أي حفلة تفوتكم.