من بنطلون قديم لحقيبة مدرسية توزع مجانًا.. اعرفوا حكاية شنطة مروة!
الرجوع للمدارس حقائب مدرسية للمحتاجين شنط مدرسية مبادرات خير في مصر مروة الشريف
Cairo 360
عمر مراد
مروة الشريف، بنت مصرية قررت تفكر برة الصندوق شوية، وتعمل فكرة إنسانية تخدم بها أطفال محتاجين ومش قادرين يشتروا شنطة مدرسية، خصوصًا وإننا في موسم الرجوع للمدارس.. تعالوا نعرف حكاية شنطة مروة اللي عملتها علشان تثبت للجميع إن بلدنا مليانة خير.
بحماس وموهبة وحب للإنسانية، قدرت “مروة” تحول البنطلون القديم لشنطة مدرسية مميزة وعملية وتستحمل شقاوة الأطفال، وكل ده بأدوات بسيطة جدًا، وخلت شعارها هو “بنحول بنطلونك القديم لأجمل شنطة مدرسية يستفاد بيها طالب مش قادر يشتري شنطة جديدة”.
بتقول “مروة الشريف لـ “كايرو 360” إن الفكرة عجبتها لما طبقها زميل لها في القاهرة، فبدأت تطبقها بشكل عائلي الأول، وبعدها كبرت الفكرة، وأصبحت مع زميلات وزملاء لها بيوزعوا الشنط على عدد كبير من الأطفال، ولما زاد الضغط على المبادرة، أصبحت بتتفق مع ورش ومصانع تنفذ لها الشغل، وبتكون التكلفة بسيطة، من 25 إلى 40 جنيه، وهي وأصدقائها اللي بيدفعوا التكلفة كحب للخير ورغبة في مشاعدة مجتمعنا.
حلم مروة الفكرة تكبر أكثر وأكثر وتنتشر في كل مكان في مصر.
بترحب مروة باستقبال تبرعات البناطيل القديمة من أي شخص مؤمن بالفكرة وحابب يساعد، وبتفكركم دائمًا: ما تنسوش أبدًا إن البنطلون القديم ممكن يبقي أجمل شنطة مدرسية هيستفاد بيها شخص تاني مش قادر.
