The Definitive Guide to Living in the Capital , Cairo , Egypt

 نظرًا لرتم الحياة السريع اللي بنعيشه اليومين دول وأيامنا الزحمة المليانة ضغوط بنبقى محتاجين نحقق بعض الانتصارات والإنجازات البسيطة علشان نقدر نكمّل مشي في دنيتنا دي من غير ملل ونجدد روحنا، الشعور ده غالبًا بييجي لما بننجح في شيء و لو بسيط ونبقى متقنينُه.

لكن إن إحنا ناخد خطوة ممارسة شيء جديد أو تعلُّم حاجة مختلفة ساعات بيمنعنا عنها كلامنا عن عدم وجود الموهبة أو عدم وجود الوقت، في حين إن فيه أنشطة وفنون كثيرة مش محتاجة منك موهبة ولا حتى وقت كبير علشان تتقنها وتتعلمها.

 

هنقول لك خلال السطور الجاية عن بعض الأنشطة اللي تقدر تتعلمها في أقل من سنة و تستمر معاك بقيت عمرك.

 

الرسم:

وده مجال واسع ولذيذ لتحقيق المطلوب:

 عندنا فيه فن الـ doodling والـ mandala:

انتشر أوي الفترة اللي فاتت بين الناس علشان بيدّي بهجة كده وجمال بياخد العين، هو في الغالب بيعتمد على تجميع تفاصيل بسيطة في شكل منمق وفني.

 مجرد ما تتعلمه هتلاقي كل مساحة فاضية تقع عليها عينك فرصة هايلة تزينها بالزخارف بتاعتك (الحيطان – غلاف الكشاكيل – جراب الموبايل .. الخ).

والخط العربي:

بس الحقيقة بحر الخط العربي واسع و عميق محتاج نفس وطول صبر، بس بما إننا بنتكلم في حاجة سريعة يبقى اللي ممكن تتقنه في وقت بسيط (خط الرقعة والديواني)

و ما دام اتكلمنا عن الخط العربي يبقى وجب نذكر "الزخارف الإسلامية":

ودي بتنقسم إلى هندسية ونباتية، الأتنين لهم أصول بس سهلة في التعليم والتنفيذ وممتعة وجمالها خاص جدًا.

 

 

المزيكا:

الحقيقة المجال ده ضيق شوية لأن إتقان عزف الآلات الموسيقية محتاج وقت كبير وصبر لكن (الطبلة وآلات الإيقاع) بشكل عام زي الدرامز والدُف وغيره من أقل الآلات اللي بتاخد مجهود في تعلمها وفي نفس الوقت مبهجة وعزفها مش متعب.

وكذلك (الاكسيليفون) .

 

الرياضة:

الرياضات بشكل عام مدة تعليمها بتختلف باختلاف الأشخاص والأجسام، بس اللعبة الجوكر حاليًا في كل الرحلات والخروجات "تنس الطاولة".

الحقيقة لما بتتعلم مبادئ وأصول أي حاجة بتستمتع أكتر بممارستها عن قبل كده لما كنت بتمارسها بالحُب، و ده هيخليك في أي رحلة قررتم تلعبوا فيها بينج بونج استمتاعك باللعب يزيد.

 

 

تعلُم الكوروشية:

معظم البيوت المصرية لازم تلاقي الست المتقنة لعمايل المفارش الكوروشيه، في الغالب بتبقى جداتنا وده بسبب أن الكوروشيه سهل في أنك تتعلم مبادئه من (العقدة والغرزة) مش كيميا أبدًا وهما حياتهم كانت رايقة فالموضوع مناسب جدًا لهم وأظنه مازال لسه مناسب بسبب جمال ومنفعة منتجه الأخير.

 

في النهاية (الهمّة و عدم الكسل) هي كلمة السر.

سلام عليكم.