The Definitive Guide to Living in the Capital , Cairo , Egypt

في السنوات الأخيرة، انتشرت في القاهرة مهنة جديدة، وهي عربات بتتجول في مناطق مختلفة لشراء الزيوت المستعملة، وأصبح من الشائع إنك تسمع شخص بينادي في الميكروفون ويقول: “نشتري زيت الأكل المستعمل بأعلى سعر”، وكتير مننا بقى عندهم تخوف أن الزيوت دي بيعاد تدويرها وبتتعالج وتنزل تتباع تاني كزيوت للطعام! لكن الحقيقة مختلفة تمامًا، والتخوفات مش في محلها.

تعالوا نعرف سر “الزيوت المستعملة” وسر رغبة بائعين في شرائها.

بحسب تقرير حديث نشره موقع نشرة إنتربرايز، شراء زيت الأكل المستعمل في مصر ورائه شركات ناشئة متخصصة، وده علشان يحولوه لوقود حيوي مش علشان يعيدوا بيعه كزيت طعام، والشركات دي لا زالت بتواجه أزمة في جمع زيوت الطعام من المطاعم والبيوت، علشان يحولوه لوقود عضوي محليًا، والشركات دي بتسعى للبحث عن مستوردين في الأسواق العالمية يشتروا اللي جمعوه.

2.5 مليون طن زيت نباتي بيستهلكها المصريين كل سنة، وده طبقًا لتقرير المركز القومي للبحوث في 2020، وبيتم رمي 90% منها في الصرف الصحي، وده بيسبب انسداد في الشبكات، وبتحتاج صيانة بمبالغ كبير، ولكن من المتوقع أن مخلفات الزيت اللي ماكنش ليها لازمة عندنا تبقى ثروة قومية، لأن لو تم استغلال الزيوت دي بشكل صحيح والناس بطلت ترميها في الصرف الصحي هتدخل 11 مليار دولا سنويًا قبل 2030، خاصة أن السوق المحلية في مصر حاليًا بتحقق 14 مليون دولار سنويًا وده 4% بس من الإنتاج المحتمل، وفيه 26 شركة بتشتغل في زيت الطعام سواء بتصدر أو بتنتج وقود ديزل حيوي، أو حتى لصناعة الصابون.

وبيستخدم الوقود الحيوي اللي بيخرج من الزيوت النباتية والدهون الحيوانية في كل المحركات سواء صغيرة زي السيارات أو كبيرة زي الطائرات، وهو آمن أكتر ومافيهوش انبعاثات كربونية وممكن يستخدم بشكل مباشر أو بيتم خلطه مع وقود الديزل العادي.

الطلب على الزيوت النباتية المستعملة كبير وخاصة من أوروبا اللي عندها شركات ومصانع كتير وكبيرة ولكن عندهم نقص كبير وواضح في الزيوت المستعملة واللي هي أساس التصنيع عندهم.

خبراء وعاملين في مجال تجميع الزيوت المستعملة أكدوا أن ممكن مصر تصنع الوقود الحيوي محليًا من الزيوت والمحاصيل المزروعة مخصوص لكده وممكن كمان تكون مركز مهم في الشرق الأوسط كله، لأن الإنتاج المحلي مش مكلف وكمان سريع ولكنه محتاج إجراءات وقوانين منظمة له. ومصر بتنتج حاليًا 50 ألف طن محلي، وده يعادل نسبة 0.4% من الإنتاج الأوروبي.

ومن المتوقع إنشاء مصنع وقود مصري للمهمة دي باستثمارات 600 مليون جنيه بمعدل إنتاج 350 ألف طن سنويًا.

من المعوقات اللي بتواجه الصناعة دي صعوبة جمع الزيت المستخدم، لأن الثقافة دي لسة مابقتش منتشرة في مصر، وبالتالي الكميات اللي بيتم جمعها سواء عن طريق الشراء أو تبرع المصريين مش كافية، وحاليًا زي ما أنتم لاحظتم أكيد، فيه ناس بتلف في كل مصر علشان تجمع الزيت وكمان فيه تطبيق اسمه جرين بان بيساعدكم على التواصل مع واحدة من الشركات اللي بتجمع الزيت.

يعني بعد كده بدون خوف اتبرعوا أو بيعوا الزيت المستعمل علشان ده بوابة جديدة للاستثمار وهتفتح باب مهم في الحفاظ على البيئة وتشغيل الشباب وتقوية الاقتصاد وتوفير العملة الصعبة.