The Definitive Guide to Living in the Capital , Cairo , Egypt

اليومين اللي فاتوا عدوا علينا ولا أيام الشتا. فجأة الدنيا قلبت هواء وبرق ورعد، وأمطار غرقت الدنيا. وكانت أكبر الخسائر من نصيب أصحاب العربيات، اللي عربياتهم غرقت واتعرضت لتلفيات كبيرة جدًا. علشان كده هنقول لكم في المقال ده شوية نصائح تحمي عربياتكم من التلف، لو غرقت بسبب المطر:

أولًا- قبل ما تتعرض للغرق:

1- لو هتعدي في مكان فيه بركة مية، شغل الانتظار ونور الشبورة أمامي وخلفي.

2- امشي بالراحة في المية لسببين مهمين: علشان تبرد العفشة والموتور بالتدريج – ولأن المشي بسرعة في المية ممكن يرفعها للأجزاء الكهربائية العلوية، وده يبوظ العربية ويخليها تقف.

3- بلاش تمشي في نص الطريق علشان البلاعات والنقر.

4- امشي في المية لحد ارتفاع الباب بس. بلاش تخليها تدخل جوة.

5- بعد نهاية الأزمة، ارفع العربية في أي بنزينة، ورش المفصلات بسولار وزيت أو (WD 40).

ثانيًا – لو العربية بالفعل غرقت:

1- افصل البطارية وخرجها برة.

2- ماتحاولش تدورها أو حتى تفتح الكونتاكت.

3- هتفك صالون العربية بالكامل وتطلعه بره. وتغسلهم كلهم بالمياه بما فيهم الموتور. علشان مياه الأمطار مع التراب بيكون فيها نسبة أملاح، بتاكل مكونات العربية.

4- فك كل أجزاء العربية (تابلوه – أبواب – كوالين – كمبيوترات – الدينامو –  المارش – وغيرهم).

5- غير الفلاتر والبوجيهات والزيت.

6- افحص جسم العربية من جوة علشان تتأكد لو في بداية برومة، تعالجها.

7- اتأكد من جفاف وسلامة كل أجزاء العربية، وتكشف عليها بجهاز كشف أعطال، قبل تقفيلها من تاني.