Cairo 360
كتب: محمد طلعت
كتير مننا تابع حادثة محمد أحمد عبد العزيز طالب كلية الهندسة، اللي اتقتل وهو بيشتري لاب توب كان معروض على موقع أوليكس بعد ما العارض استدرجه بإعلان وهمي عن بيع جهاز آبل بـ 25 ألف جنيه، وخلاه يروح له حديقة في حي النزهة، مع زميله وهما طلاب من منطقة عين شمس، وهددوه بمطواة وسكين، ولما قاومهم قتلوه بـ5 طعنات نافذة في الصدر والظهر.
وإحنا في كايرو 360 حبينا نعرض عليكم شوية نصايح علشان تحافظوا على أمنكم وسلامتكم، وعلشان ماحدش منكم يتعرض لموقف فيه خطر على حياته.
اعرف البايع كويس
لازم تتعرف على عارض المنتج، وتبحث عنه وعن إعلاناته السابقة وتقييم المشترين له، كمان ممكن تبحث برقم تليفونه عن طريق برنامج “تروكولر” الشهير.
مكان البيع
أرفض أن المقابلة تكون في مكان البائع لو أنت لوحدك، ولازم يكون معاك حد يقدر يساعد لو فيه خطر لا قدر الله، واللي هيروح معاك لازم يستنى بعيد شوية، مع تعريف البائع إن أصدقاءك بانتظارك، وطبعًا الأفضل عملية البيع تتم في مكان عام وعلى أرض محايدة، مثلًا محطة مترو أو إحدى المياديين الكبرى، لو المنتج ممكن يتنقل بسهولة، ولو المكان أول مرة تروح له دور على حد من المنطقة أو قريب منها في دائرة أصدقاءك ولو مافيش روح قبلها واقعد وأعرف كل حاجة عنها ولو حسيت بالخطر امشي.
التجربة والمبايعة
ممنوع تدفع أي فلوس قبل ما تجرب المنتج وتتأكد من جودته، ولازم توصل لاتفاق استرجاع مع البائع في خلال مدة صغيرة، علشان لازم تجرب المنتج، كمان أطلب ورقة مبايعة بالرقم القومي والإسم كامل وحدد فيها تاريخ الشراء والضمان وفترة التجربة، إذا كان المنتج غالي لضمان حقك، وخاصة الإلكترونيات وأجهزة الهاتف المحمول.
تصرفات مريبة
علشان تحافظ على سلامتك لو لاحظت تغير نبرة صوت اللي بتتعامل معاه أو تحجج وغير الميعاد والمكان، متتعاملش معاه حتى لو كان حسن النية، ببساطة سلامتك أهم من البيع والشراء، وطبعًا لازم تتأكد من تواصلك معاه من رقم تليفون واحد ولو كلمك من أكتر من رقم اعتذر عن اتمام الشراء للحفاظ على أمنك.
الثقة في النفس
لازم تبقى واثق في نفسك مهما كان الأمر، وزي ما بيقولوا اليومين دول “أسد يالا”، علشان لو لا قدر الله فيه حاجة اللي قدامك هيخاف من ثقتك وقوتك.
العروض الوهمية
لو لقيت عرض غير منطقي اعرف ان الحكاية فيها خطر فبلاش منها، لأن العروض دي بتكون وهمية، ولازم عملية البيع تكون مباشرة وبدون مندوب شحن أو وسيط.
فني وسائق
دايمًا لو هتشتري حاجة محتاجة فني يكشف عليها لازم تاخد معاك حد حتى لو هيكلفك فلوس، لأنك بتشتري سمك في مياه، والأفضل إنك تكشف على الأقل بشكل سريع على المنتج وتعرف حالته، ووقتها تبقى ضامن إن فلوسك ماترمتش في الأرض، ولو المنتج اللي هتشتريه محتاج سيارة للنقل يبقى لازم تاخدها معاك، ومتجيبش عربية من منطقته أو حتى هو يوفر لك عربية.
توزيع الفلوس
لما تشتري حاجة وتكون في منطقة بعيدة أو مش عارفها خلي جزء من الفلوس معاك لحد ما تتفق على السعر، والجزء التاني خليه مع صديقك اللي هيكون مستنيك قريب منك، أو قسم الفلوس وحط كل جزأ في جيب تحسبًا لأي خطر مش معمول حسابه.
حماية البنات
البنت تحديدًا، لازم يكون معاها راجل أثناء عملية الشراء، ومقابلة البائع لازم تكون في مكان عام، وبصفة عامة ماتشتريش من حد حاول يثبتك بكلمات غزل في التليفون، وأوعي تكوني لوحدك مهما كانت الظروف حتى لو كنت هتشتري من بنت مش من راجل، وكمان متخليش اللي بيتعامل معاك يجرك لحوارات فرعية، فقط الكلام في المنتج وعملية البيع والشراء.
يفضل كمان بلاش تتصلي بالبائع من تليفونك الشخصي، كلميه من تليفون صديق ليكي، علشان لو كان شخص مش كويس ماتتعرضيش لمعاكسات منه لعد عملية البيع.
مقترح
الحياة في كايرو
من غير مشاوير.. سجل في بوابة مصر الرقمية وانجز أوراقك الحكومية في دقائق!
استخراج بطاقة رقم قومي أونلاين التسجيل في بوابة مصر الرقمية +8
الحياة في كايرو
