The Definitive Guide to Living in the Capital , Cairo , Egypt

الحياة في كايرو -
مقترح

هتلاقي نفسك.. 13 منطقة في القاهرة هيسافروا بيك للماضي الجميل

أجمل الأماكن في وسط القاهرة أماكن خروجات
هتلاقي نفسك.. 13 منطقة في القاهرة هيسافروا بيك للماضي الجميل
بواسطة
Cairo 360

يمنى أحمد

الصورة الرئيسية: محمد نبوي

كتير بنشتاق للماضي، بنفضل ندور على أي حاجة ترجعنا ليه تاني أو تفكرنا بريحته. والقاهرة فيها أماكن هتفكرك بزمان، سواء وأنت صغير أو لماضي المدينة اللي كان كله حضارة وشياكة وفن. وفيه مناطق هتحس فيها إنك لقيت نفسك.

في السطور الجايه هنعرفك على 13 مكان في القاهرة هيسافروا بيك للماضي. استعد لركوب آلة الزمن!

شارع المعز:

في الجمالية وأنت ماشي ناحية خان الخليلي ومسجد الحسين هتلاقي شارع طويل كده مليان مساجد ومباني عظيمة، ده شارع المعز. يمكن من شهرته ممكن تكون عارفه بس هتكون خسران لو مجربتش تمشي فيه شوية تتأمل الجدران وحيوية الشارع، هيسافر بيك لأحلام زمان وهتحب فيه نفسك.

الدرب الأحمر:

لما تدخل حي الدرب الأحمر هتحس بإن الزمن خطفك ورجعك عند نقطة معينة، وقتها مش هيجي في بالك غير جدك وجدتك اللي كانوا بيحكو حواديت آخر الليل عن الأبطال والجميلات. المنطقة أشبه بمتحف مكشوف بيوضح لك قد إيه إن القاهرة عظيمة، هتحس بقيمة المدينة هناك.

وسط البلد:

بتمر على بلاد مميزة كتير وبتشوف شوارع مبهرة، لكن تظل وسط البلد بكل هدوئها وعماراتها من أفضل الأماكن اللي ممكن تشوف نفسك فيها وتشم فيها روايح الزمن الجميل. حتى لما بتتوه فيها بتحس إنك مطمن وإنك ممكن ترجع عن طريق أي محطة مترو، وبرضه مابتشبعش منها مهما تهت.

منطقة الحسين:

دايمًا الأماكن اللي بتمس عقيدتنا وروحانيتنا بيكون ليها ميزة عندنا، بس مساجد آل البيت بتكون مختلفة أكتر، بنرجع فيها لكل مرة ربنا نجدنا فيها من أزمة أو جينا ربنا نجانا من الهم. تقدر تشوق قلبك ببساطة هناك في المشهد الحسيني والمسجد والضريح.

منطقة عابدين:

وهو حي بيجمع بين القدم والحداثة، بيرجع للقرن التاسع عشر، وبيضم قصر عابدين اللي فيه كتير من القطع الأثرية الملكية، المكان تحس إنه أشبه بلوحة فنية مش عايز تنزل عينك عليها من جمالها، وهتحس فيه بالونس والضحكة الحلوة حتى لو لوحدك.

منطقة الغورية:

هيا يمكن تبان منطقة تجارية من بره في تجارة الأقمشة والمفروشات والسجاد ولكنها ليها قيمة تاريخية كبيرة خاصة إن فيها باب زويلة، وممكن ترجعك لأيام المماليك اللي قرأت عنهم في كتب التاريخ وتقف تتخيل حياتهم كانت عاملة إزاي هنا.

الكوربة:

ودي منطقة في مصر الجديدة بترجعك لأيام الخمسينيات، أيام الملوك والباشاوات، معظم بيوتها على الطريقة البلجيكية وده لأن اللي صممها كان معماري بلجيكي، هتحس بروح أوروبا هناك وهترجع بيك لأحلام كان نفسك تحققها فيها.

منطقة الخليفة والسيدة عائشة:

ودي من أهم مناطق مصر القديمة اللي هتقابل فيها ماضي المدينة بناسها الطيبين، فيها أماكن كتير ممكن تزورها زي قلعة صلاح الدين الأيوبي ومسجد السلطان حسن ومسجد السيدة عائشة النبوية وغيرهم.

منطقة السيدة زينب:

ودي ليها شعبية كبيرة عند المصريين، هتحس بإن فيه الهام نزل عليك هناك وفرحة انت مش عارف مصدرها أول أما تدخل المنطقة.

الزمالك:

ودي هتحس فيها كأنك في فرنسا، الجزيرة اللي بيحفها النيل من جميع الاتجاهات فيها أماكن وقصو حلوة أوي تقدر تشوفها، غير إنك كمان هتشوفها في الشتا مسكن العشاق، وفي الصيف انطلاقة ليهم وللعائلات.

كوبري قصر النيل:

ودي أشهر كوبري للتمشية في مصر، واقف على جوانبه أربع أسود كأنهم حارسينه، تقدر تتصور وتقدر تقف في وش الهوا اللي هيديك إحساس منعش جدًا وهيرجعك لهوا البحر لو كنت من بحري وهوا الأراضي الزراعية لو كنت من قبلي.

منطقة شبرا الخيمة:

ودي لما تمشي في شوارعها وتتأمل فيها هتحس بحنين لطفولتك، لعب البلي والغميضة وغيرها، هتشوف فيها المصريين البسطاء والمتسامحين جدًا وهتحس انك مش غريب عن المنطقة لو أول مرة تروحها.

حي الوايلي:

وده من أجمل المناطق اللي ممكن تنزل فيها في القاهرة، ناسه بسطاء وبيوته طرازها فريد، كل الشوارع اللي هناك نقدر نقولك إنها هتبسطك.

مقترح