هدايا من القلب.. 5 أفكار بسيطة تخلي عيد الأم أحلى من أي هدية!
أفكار مميزة لعيد الأم أفكار هدايا طرق إسعاد الأم عيد الأم مفاجآت عيد الأم هدايا بدون تكلفة هدايا بسيطة
Cairo 360
الصورة الرئيسية: micheile henderson
الصورة الداخلية: Ijaz Rafi
عيد الأم جاي، وكل واحد فينا بيفكر يجيب هدية لمامته تعبر عن حبه ليها، بس أحيانًا الظروف المادية بتخلينا نحس إننا مش قادرين نجيب حاجة تليق بيها. بس الحقيقة إن الفرحة مش بس في الهدايا الغالية، أوقات كتير لفتة بسيطة بتكون أغلى عندها من أي حاجة تانية. علشان كده، قررنا في كايرو 360 نجمع لكم 5 أفكار سهلة، مش هتكلفكم حاجة، لكنها هتخلّي عيدها مختلف وتحسّسها قد إيه هي غالية عندكم!
5 هدايا بدون تكلفة تخلي عيد الأم أحلى
ريحها في عيدها
بدل ما ماما تعمل كل حاجة كالمعتاد، خد مكانها في المهام اليومية: نظّف، اطبخ، اغسل المواعين، روّق البيت.. خليك “الأم” ليوم واحد، وهتشوف فرحتها!
اتمشّى معاها
خدها لمكان بتحبه، حتى لو مجرد تمشية على الكورنيش، اللحظات الحلوة والكلام اللي هيدور بينكم هيكون أجمل هدية ليها.
اعمل بنفسك أكلتها المفضلة
المطبخ دايمًا مسؤوليتها؟ مش في اليوم ده! اعرف أكلتها اللي بتحبها واطبخها بنفسك، حتى لو بسيط، المهم إنها تحس إنك مهتم بيها.
حقق لها أمنيتها فيك
كل أم عندها حاجات صغيرة بتتمنى تشوفها في ولادها.. استغل اليوم ده وحقق لها واحدة منها! لو حاجة مضايقاها فيك، حاول تغيّرها، لو طلبت منك حاجة قبل كده واتأخرت فيها، اعملها فورًا!
خلي اليوم كرنفال
شغل لها مسلسلها المفضل، أو أغنيتها اللي بتحبها، خلّي الجو في البيت فرحة واحتفال، وخليك معاها طول اليوم علشان تحس بوجودك جنبها.
وأخيرًا..
كل أم لها طريقتها في الفرح، وأنت الوحيد اللي تعرف إيه اللي ممكن يبسطها.. خليك مبدع في التعبير عن حبك ليها، وكل سنة وكل أم طيبة وبخير!
مقترح
معالم وسياحة
معبد العدالة على النيل: صور من جوه المحكمة الدستورية وحكاية مهندسها اللي كان نفسه يبقى مخرج!
أحمد مصطفى ميتو الطراز الفرعونى +8
مطاعم
