The Definitive Guide to Living in the Capital , Cairo , Egypt

كلنا زعلنا لما رحلت عن عالمنا سيدة الشاشة العربية فاتن حمامة، ودلؤقتي هترحل عن عالمنا للمرة التانية، وده بسبب هدم السينما المشهورة اللي حملت اسمها لسنوات طويلة.. وهي سينما فاتن حمامة في منطقة منيل الروضة.. علشان يبنوا مكانها برج سكني.

من كذا سنة تم إغلاق سينما فاتن حمامة، وبعد كدة تم عرضها للبيع بعد وفاتها بأسبوعين، وشهد الوسط الفنى والشارع المصرى حالة من الغضب مع بداية تنفيذ قرار الهدم مؤخرًا، وده بعد صدور ترخيص هدم رقم 10 لسنة 2018 من جهاز تفتيش البناء التابع لوزارة الإسكان.

تم افتتاح سينما فاتن حمامة يوم 29 ديسمبر عام 1984 بقرار من عبد الحميد رضوان وزير الثقافة وقتها، علشان تكون أول دار عرض سينمائي قطاع عام من الدرجة الأولى يتم اطلاق اسم أحد نجوم السينما المصرية عليها، وده كان تقدير كبير لسيدة الشاشة العربية فاتن حمامة ولعطائها طوال مسيرتها الفنية. وحضرت فاتن حمامة بنفسها افتتاح السينما مع عدد كبير من الشخصيات العامة ونجوم السينما المصرية.

الاسم الأصلي للسينما كان سينما ميراندا، وبلغت تكاليف إعادة بنائها 600 ألف جنيه وكانت بتحتوى على 1100 كرسي، وكان فيها أحدث ماكينة للعرض السينمائي مستوردة من ألمانيا.

أول فيلم اتعرض فيها هو “عندما يبكى الرجال” بطولة فريد شوقى ونور الشريف وفاروق الفيشاوى ومديحة كامل، أما أخر فيلم فكان فيلم “ريجاتا” لعمرو سعد.

تم إغلاق السينما رسميًا يوم 31 يناير عام 2015، واتحط عليها إعلان بعرضها للبيع، وده بعد انتهاء فترة تعاقد الشركة العربية للإنتاج والتوزيع السينمائي اللي كانت مأجراها.

الكارثة إن السينما اتحولت في الفترة الأخيرة لمخزن للأغراض القديمة ومكان لركن الدراجات البخارية، كمان حد حولها لغية لتربية الحمام.

أمر محزن الحقيقة 🙁