The Definitive Guide to Living in the Capital , Cairo , Egypt

الصورة الرئيسية: Lucian Alexe

مع تكرار حوادث التصادم على الطرق السريعة في مصر، كتير من الناس بقوا يسألوا: هل فيه طريقة تخلّي الطرق أكثر أمانًا؟

رائد الأعمال المصري محمد أبو النجا طرح مؤخرًا فكرة تستحق الوقوف عندها، وبتفتح باب مهم عن دور التكنولوجيا في إنقاذ الأرواح.

أبو النجا نشر على صفحته الشخصية على فيسبوك اقتراح عن نظام اتنفذ في أوروبا وأمريكا، نجح بالفعل في إنقاذ آلاف من حوادث مميتة – خاصة نوع محدد وخطير جدًا: الحوادث الناتجة عن السير عكس الاتجاه.

“أبو النجا” ما أشارش بالاسم للنظام، لكنه وصفه بدقة، وبالبحث لقينا إنه بيطابق فكرة طوّرتها شركة Bosch تحت اسم:

Cloud-based Wrong-Way Driver Warning System

وده مش تطبيق بالمعنى التقليدي، لكن نظام بيشتغل سحابيًا وبيتدمج في أجهزة الملاحة، الراديو الذكي، أو أنظمة السيارات الحديثة.

إزاي بيشتغل النظام؟

في كايرو 360 دورنا على تفاصيل النظام ده، ووصلنا للتالي:

بيعتمد على تتبع حركة العربية من خلال GPS.

بيقارن الحركة دي بقاعدة بيانات ضخمة بتوضح الاتجاهات المسموحة في كل طريق.

لو فيه عربية ماشية عكس الاتجاه، النظام بيبعت إنذار في أقل من 10 ثواني:  واحد لشرطة المرور، لكن الأهم: تحذير فوري لكل العربيات اللي ماشية في الاتجاه الصحيح على نفس الطريق.

التجربة الأوروبية أثبتت إن الفكرة أنقذت حوالي 6000 شخص من التصادمات المباشرة، واللي عادةً بتكون مميتة أو شديدة الخطورة.

هل ممكن نطبّقه في مصر؟

أبو النجا بيقول إن النظام ممكن يتنفذ بسهولة هنا، سواء بتركيبه ضمن إجراءات تجديد الرخص، أو من خلال شراكة حكومية مع شركة Bosch – واللي فتحت بالفعل مصنع كبير لها في مصر مؤخرًا.

كمان بيقترح إن تكلفة التطبيق ممكن تغطيها مخالفات السير العكسي، وبالتالي ميبقاش فيه عبء على المواطن أو الدولة، والأهم: نقلل الحوادث قبل ما تحصل، مش بعد ما ندفع التمن.

وأخيرًا..

الطُرق في مصر محتاجة تدخل عاجل ومبتكر، والأفكار اللي زي دي – حتى لو بسيطة – ممكن تكون بداية حقيقية لحل مشكلة مزمنة.

تحية لكل عقل بيفكر في أرواح الناس، مش بس في الربح أو المتاجرة بالنوع ده من الحوادث.