Mohamed Talaat
وزارة الزراعة أكدت إن معرض زهور الخريف هينطلق للمرة الأولى، في المتحف الزراعي بالدقي، في شهر نوفمبر، وهيستمر 45 يوم، وهيشارك فيه 170 عارض ما بين شركات وبائعين ومهتمين بالمجال.
المعرض هتتوفر فيه زهور الخريف المختلفة، وهيتاح فيه كمان بيع 130 صنف مختلف من منتجات الزراعة، سواء شجيرات أو أشجار وغيرها، وده لأن معدلات تصدير زهور القطف والزينة قليلة جدًا لأن المناخ خارج مصر غير مناسب لها في الوقت الحالي، بعكس مصر اللي مستوعبة مختلف الأنواع في كل الفصول، والوزارة أكدت انها هتقدم كل الدعم اللوجيستي للمزارعين والعاملين علشان يستفيدوا من محصولهم.
معرض نبات الزينة والزهور بالخريف هيتعمل على مساحة 25 ألف متر، وهيضم 170 من كبرى الزهور القطف ونبات الزينة، والمشاتل ومستلزمات الإنتاج واللاند سكيب وغيرها، وهيكون حدث سنوي رسمي زيه زي معرض زهور الربيع اللي بيتعمل كل سنة في حديقة الأورمان، وهيكون فيه كافة الأنواع اللي ممكن تستخدم في الحدائق والمنازل والمكاتب.
