The Definitive Guide to Living in the Capital , Cairo , Egypt

جمعية سائقي ومالكي التاكسي الأبيض أعلنت إنها مش هتتعاون مع شركات النقل الذكي في مصر “أوبر وكريم” علشان يشغلوا التاكسي في خدمات النقل، وكمان أكدوا أنهم هيطلقوا تطبيق جديد هيكون اسمه “سمارت بي”، اللي هيكون ملك للجمعية.

محمود عبد الحميد، رئيس جمعية سائقي ومالكي التاكسي الأبيض، قال في تصريح خاص لموقع مصراوي، إن التطبيق هينطلق أول مارس 2020، وأنهم هيكونوا كيان منافس بقوة لأوبر وكريم، على حد تعبيره.

التطبيق هينطلق عن طريق شركة “Smart Bee”، وهتكون التعريفة الخاصة بيه زي التعريفة العادية 7 جنيه لفتح العداد، و3 جنيه لكل كيلو، وهتكون ساعة الانتظار الأولى بـ17 جنيه، وكل ساعة زيادة 8 جنيه، ومن المتوقع أن التطبيق ده يضم 376 ألف تاكسي أبيض.

جمعية التاكسي الأبيض حددت مواصفات خاصة للعربيات اللي هتشارك في التطبيق، منها إنها لازم ماتقلش عن موديل 2009، وعمر السائق من 21 ولحد 55 سنة، وكمان لازم يكون حسن المظهر وبيجيد القراءة والكتابة، وهيعملوا تحليل مخدرات لكل المشتركين لضمان الأمان للراكب.

الجمعية بتقول إنها بتستهدف تقديم خدمة مميزة، بسعر أقل وأمان أكتر، وأنهم عاوزين ينافسوا شركات النقل الذكي، وحاليًا بيتم فحص كل سيارات التاكسي اللي عندها الرغبة في المشاركة علشان التأكد من سلامتها ومطابقتها للمواصفات الفنية.