The Definitive Guide to Living in the Capital , Cairo , Egypt

كلنا بنستنى رمضان من السنة للسنة، شهر الخير والبركة، والذكريات الجميلة. ومن أجمل الحاجات اللي بيتميز بيها رمضان، اللمة الحلوة مع الأهل والأصدقاء.

جمعنا لكم 4 قهاوي حلوة في القاهرة تقعد فيهم مع أحبابك.. وأكيد.. أكيد.. هتحس بجو وبهجة رمضان.

قهوة بيت زينب خاتون الأثري بالحسين:

البيت موجود ورا جامع الأزهر، وبيرجع تاريخه للعصر المملوكى، وهو مكان شرقى، واسع، ممتاز، ومريح جدًا، هتحس هناك أنك رجعت بالزمن مئات السنين.

اتحولت ساحة بيت زينب خاتون الأثرى اللي موجودة على يمين المنزل، والموجودة بين مجموعة من الآثار الإسلامية، لقهوة مصرية اسمها قهوة زينب خاتون، وبتتميز القهوة دي بطابع مصري تراثي قديم.

القهوة بتتقسم لمنطقتين، الأولى عبارة عن قعدة عربى، والتانية قاعدة عادية، وبتتقدم فيها المشروبات المصرية المختلفة، كمان ممكن تطلب زلابية طعمها جنان.

الأسعار مناسبة جدًا.

قهوة الفيشاوي:

قهوة القاهرة العظيمة شهدت كتابة جزء كبير من روايات الأديب المصرى العالمى نجيب محفوظ الحاصلة على جائزة نوبل فى الأدب. بسبب أزمة السياحة مافيش طوابير انتظار زى زمان، ولا حتى الزحمة اللى ممكن تعمل مشاكل للى بيتضايقوا من الأماكن المقفولة.

قدرت الفيشاوى تحتفظ بجو القاهرة القديمة اللى صعب يتنسى.

مكانها فى شارع ضيق فى سوق خان الخليلى المزدحم، وشكل القهوة الشهيرة روعة بالمشربية الخشب الغامقة والحوائط بلونها الأصفر المأكسد. شاى بالنعناع برائحته العطرية الجميلة بيتقدم فى أبريق شاى أزرق غامق محطوط على صوانى ذهبية كبيرة وبيتصب فى كوبايات زجاج مزخرفة، وفى نفس الوقت هتلاقوا نجف ومرايات متبروزة بالخشب؛ الموضوع كله عبارة عن كرنفال مبهج خصوصًا للمصورين ومحبى الجمال.

هتلاقي بياعين متجولين دائمًا حوليك، بيبيعوا كل حاجة بداية من السبح لغاية سلاسل زرقا.

تفاصيل أكتر هنا.

قهوة اللورد

قعدة حلوة بعد تمشية في شارع المعز في القاهرة الإسلامية، الموضوع مش في قعدة القهوة نفسها، الموضوع في شوية التمشية اللي هتعملهم قبل ما توصل لقهوة “اللورد” الموجودة في شارع المعز في منطقة الحسين.

املأ وجدانك من المنطقة العريقة والمدقات الطويلة والمآذن العالية اللي هتبقى على يمينك وشمالك من أول ما تدخل شارع المعز من ناحية خان الخليلي خلف مسجد سيدنا الحسين، هتقف في السكة 100 مرة علشان تتفرج على كل حجر في كل مبنى حواليك، وهتشوف إضاءات مميزة من الأرضيات وعلى أبواب المساجد ومن المحلات المنتشرة في كل المنطقة.

القهوة قريبة من باب الفتوح القهوة نار على علم، اسأل أي حد في المنطقة على اللورد هيدلك على طول. القهوة مشهورة بأنها حاطة تمثال بالحجم الطبيعي لأم كلثوم وبتشغل أغانيها طوال الوقت.

الشكل التراثي للقهوة فيه ديكورات وإكسسوارات بتجمع بين شوية حاجات من الماضي لكن من عصور وفترات زمنية مختلفة، زي عربيات الخيل أو “الهودج” والتراس الأرابيسك اللي عليه تمثالين لحسن ونعيمة، على الجدران تابلوهات لجمال عبد الناصر والسادات وصور من شوارع مصر أيام محمد علي باشا وغيره.

تفاصيل أكتر هنا.

قهوة البستان:

منطقة وسط البلد بزحامها وحركتها اللانهائية لها كاريزما خاصة، يمكن سحر البنايات القديمة اللي عامل كونتراست مع زحام المحلات بأضوائها المبهرة، ويمكن كم التفاصيل الحياتية الرهيب، اللي من خلالها تقدر تفك طلاسم الشخصية المصرية. الوصول لقهوة البستان مش صعب، حتى لو مالكش في وسط البلد وشوارعها الحلزونية.

انزل تقاطع شارع شريف مع شارع قصر النيل وخذ أول شمال. المكان واسع ويساع من الحبايب ألف زي ما بنقول في مصر. اختار المكان اللي يعجبك واقعد فيه واستمتع.

تفاصيل أكتر هنا.