والدوشة مجرد موسيقى تصويرية.. 5 حاجات ممكن تعملهم في “رمسيس”
باب الحديد رحلة لميدان رمسيس رمسيس محطة مصر مسجد الفتح ميدان رمسيس
Cairo 360
يمنى أحمد
الصور: unsplash.com
بتحب الأماكن الإنسانية والهادية والبعد عن الدوشة والزحمة؟ طب هتندهش لو قولنا لك إنك ممكن تشوف في منطقة رمسيس الإنسانية رغم دوشتها! ممكن تلاقي فيها الجمال والعبقرية وأنت متخيل إنك بتكرهها؟
في السطور الجاية هندلك على 5 حاجات ممكن تعملهم في منطقة ميدان رمسيس ومش هتحس بالدوشة ولا الملل.
بُص في الوشوش.. حِس الإنسانية
هناك في رمسيس هتلاقي اللي نايم على الرصيف، واللي مستني حد، هتلاقي الأطفال اللي بتجري، اللي مبسوط وشايل الهم، هتلاقي الصعيدي واللي من بحري، هتلاقي السيناوي واللي من الوادي، وشوش كتير حواليك مختلفة، بس الفكرة إنك لما تدقق فيها، هتعيش هدوئك الخاص وهتدوق الإنسانية اللي محتاجها، هتلاقي وقتها إن رمسيس مش مجرد ميدان زحمة بس!
محطة مصر.. بوابة المسافرين الأولى
تعرف إن المخرج يوسف شاهين لما حب يعمل فيلمه باب الحديد استلهمه من اسم محطة مصر زمان لأنها كانت فعلًا باب حديد وسكة للمسافرين بالقطارات؟ محطة مصر واحدة من الأماكن اللي ممكن تزورها في رمسيس، ممكن تركز في النقوش اللي في جدران المبنى، في سقف المحطة من جوا والمطاعم ومنافذ البيع الصغيرة، وعربة القطار التاريخية اللي بتزين ميدانها من الخارج، وقتها هتعرف إن محطة مصر مش مجرد مركز للمسافرين، دي حدوتة صغيرة من حواديت ميدان رمسيس الجميل.
مسجد الفتح.. أول باب القضاة
باب بحر أو مسجد أولاد عنان أو مسجد المقس، دي كلها أسماء لمسجد الفتح قديمًا، لما بتروح رمسيس هتاخد بالك من مسجد هناك كبير، قبابه عاملة شبه اللؤلؤ، مسجد ثابت من أول ما كان الميدان ده اسمه قرية “أم دنين”، وكمان المسجد له تاريخ عبقري بيبدأ من أيام ما كان القضاة في مصر بيطوفوا على المساجد والأضرحة قبل رمضان بـ 3 أيام، يصلحوا فيها المكسور وينضفوها، وكان أول طوافهم مسجد الفتح!
المسجد حاليًا له مؤسسة خيرية بتساعد المحتاجين واللي مش قادرين يعملوا عمليات جراحية، بيعمل ده بكشف اجتماعي بس!
شارع الفجالة.. من أقدم شوارع رمسيس
رمسيس مش بس حلوة بمناطقها ومطاعمها، هتكون أحلى لو ركزت في إنسانية شوارعها، ويا سلام لو دخلت بقى شارع الفجالة ودققت في وشوش مكتباته الشابة رغم إنها أصلًا قديمة.
إيه رأيك تاخد جولة في مكتبات حسام الدين ومكتبة مصر اللي بالمناسبة هيا أقدم مكتبة في الشارع لأنها اتأسست سنة 1932، هتلاقي هناك كل اللي عايزه؛ أدوات مكتبية وكتب وماكينات، بل العجيب إنك هتشوف هناك محلات أدوات صحية وأكثر!
لما تدخل الفجالة، مش بس هتشتري كتب ومستلزمات، خليك واثق إنك هتشوف جمال إنساني في الطراز المعماري اللي هناك بعمارتها القديمة وبعض المكتبات اللي شكلها لسه ماتغيرش من القرن اللي فات، خليك واثق إنك هتنبسط.
ممكن تتبرع بالدم
ممكن تتبرع بالدم كمان لو حابب، وأحب أكدلك إن العربيات اللي هناك دي مش نصابة ولا بيضحكوا على الناس، دي تبع الهلال الأحمر فعلًا، وإن الناس اللي بتشدك دي بتبقي متطوعة وحابة تساعد أطفال السرطان اللي ممكن يكون منهم كل ناسنا وحبايبنا، فلو قادر خليك جدع وإنسان.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
