The Definitive Guide to Living in the Capital , Cairo , Egypt

حتى وسط الظروف الاقتصادية الصعبة نقدر نخرج وننبسط! إحنا بنشجعكم دائمًا على الخروج علشان تقدروا تعملوا ريفريش لحياتكم وتنبسطوا علشان تقدروا تكملوا، ودايمًا خروجات الويك إند مختلفة وبتخليكم تقدروا تكملوا الأسبوع التالي بنشاط وحيوية، والنهاردة هنقولكم على 5 أماكن تخرجوا فيها ببلاش خلال الويك إند.

شارع المعز

حي الجمالية وميدان الحسين المشي فيهم مميز بصفة عامة، لكن شارع المعز التمشية فيه مختلفة وبتغسل الروح وتفرح القلب، وتقدروا تروحوا هناك وتستمتعوا بمدارس السلاطين والمساجد التاريخية والحضارة الإسلامية وتقعدوا كمان في الشارع هناك اللي فيه أكتر من مكان للقعدة ببلاش، ولو حابين تشبرقوا قوي على نفسكم يبقى ممكن تاكلوا أو تشربوا أي حاجة بتحبوها، وماتنسوش تتصوروا بالموبايل صور خلفيتها التاريخ الإسلامي الجميل في الشارع.

 

الكوربة

إحنا بنعتبرها أصل مصر الجديدة، وهي من الأماكن اللي نقدر نقول أول ما ندخلها “أكاد من فرط الجمال أذوب”، بتاريخها وتميز مبانيها وحلاوتها، وهناك مش هتحسوا بملل أو تعب من التمشية، لكن لو تعبتم تقدروا تقعدوا ع الرصيف في أي مكان يعجبكم وتضحكوا وتلعبوا، وكمان فيه حديقة قريبة منها لو معاكم أطفال سعر الدخول فيها 5 جنيه، أو تقدروا تقعدوا على أي قهوة، وفي رأينا كفاية التمشية في ليل الكوربة الجميل.

 

كوبري المانسترلي

دي خروجة ملوكي، كل اللي عليكم تضحكوا علشان الصورة تطلع حلوة، لأن الكوبري ده واللي مصنع من الخشب معمول ببهجة وحب هيتنقلوا ليكم أول ما تروحوا ناحيته، وتقدروا تاخدوا أحلى كادرات أو تكلموا النيل اللي هيفرح بيكم وهيسمع شكوتكم ومش هيعكر صفو انفرادكم مع النيل غير بتاع الشاي أو التصوير وهما بيجروا على أكل عيشهم، بس كملوا عادي وارجعوا انبسطوا مع النيل وهتلاقوه لسه بيسمعكم.

 

وسط البلد

لو مامشتش في شوارعها بتاريخها وحضارتها وروحها يبقوا أنت مامشيتش في القاهرة وماتعرفش عنها حاجة، كل عمارة في وسط البلد لها تفصيلة مميزة لو ركزتوا فيها هتنبهروا بجمالها، طيب أنتم تعرفوا ان بين كل مجموعة عمارات في وسط البلد ممر كان بيتعمل زمان علشان يخدم العمارات دي وكأنه سوق خاص بيها؟ يعني لو دخلتوا ممر في عبد الخالق ثروت هتطلعوا الناحية التانية لشارع شريف كمثال، فاستمتعوا بخفايا وأسرار وسط البلد وماتنسوش تروحوا ممر بهلر بين شارع طلعت حرب وشارع قصر النيل وتتصوروا ببلاش.

 

نهر النيل

أي تمشية على نهر النيل جميلة، سواء على كوبري عباس العشق بتاعنا أو كوبري الجامعة أو كوبري قصر النيل وحتى كوبري أكتوبر التمشية فيه حلوة في الجو الجميل ده، لكن إحنا بقى بنرشح لكم تتمشوا من عند أركاديا مول لحد كوبري امبابة التاريخي العظيم، صحيح ممكن تخافوا منه لأنه له هيبة لكن هو من أجمل الاماكن اللي ممكن تتصوروا فيها.

 

ويك إند سعيد!