The Definitive Guide to Living in the Capital , Cairo , Egypt

هيليوبوليس أو مصر الجديدة أو “مدينة الشمس” من أجمل مناطق القاهرة وتأسست سنة 1906، وهي بوابة مصر الرئيسية اللي بتستقبل كل القادمين من دول العالم عبر مطار القاهرة الدولي، اللي هو المطار الرئيسي لمصر كلها، وجوا مصر الجديدة هتلاقوا معالم سياحية وترفيهية مميزة تخليكم تستمتعوا بيوم جميل مش هتنسوه سواء كنتم أسرة أو شلة، مهما كانت دماغكم بتحب إيه هتلاقوا كل اللي نفسكم فيه، واسم هيليوبوليس هو اسم يوناني ومعناه مدينة الشمس، ومن أشهر معالمها قصر البارون والطاهرة والاتحادية وحديقة الميرلاند وغيرهم.

تعالوا نعرف ممكن نعمل إيه في يوم كامل في مدينة الشمس!

بداية اليوم تقدروا تفطروا عند حمادة شيراتون أشهر بياع فول وطعمية في مصر الجديدة واللي سمعته سبقاه، وكمان تقدروا تجربوا أرابياتا في روكسي وكمان فيه سعيد المنوفي في ميدان الجامع، وجاد في ميدان تريومف، أو أي مكان بتحبوا التيست بتاعه.

تقدروا بعدها تتحركوا في زيارة لقصر البارون اللي هتستمتعوا بكل تفصيلة فيه، وتذكرته سعرها 20 جنيه، وهو من بناء المليونير البلجيكى إدوارد لويس جوزيف إمبان الشهير باسم “البارون امبان”، وهو مبني على الطراز الأوربي الهندي، ويجمع بين الثقافتين وافتتح عام 1911، بعد فترة بناء 5 سنوات، وبيضم 7 غرف، بأرضيات للقصر بالكامل ما بين رخام وباركيه ومرمر، وهو مبني على مساحة 12.5 ألف متر، وعرف عن القصر أنه “لا تغيب عنه الشمس”.

مش قصر البارون بس اللي موجود في مصر الجديدة، ولكن فيه قصور تانية متاح أنكم تتعرفوا عليها من الخارج زي قصر إبراهيم باشا عبد الهادي، قصر آل لملوم، قصر السلطان حسين، قصر ألفريد شماس، وقصر نوبار، وكمان دائرة أدهم باشا.

بعد زياراتكم الجميلة للمناطق الأثرية في مصر الجديدة، لازم تجددوا النشاط وتروحوا تقعدوا وسط الخضرة والبحيرة الصناعية في حديقة الميرلاند، واللي فيها كافيهات ومطاعم تناسب كل الأذواق، وده اللي هيخليكم تستمتعوا بالخضرة والماء والفيو المميز، أهم حاجة تختاروا مكان مناسب مع ميزانيتكم، ولو أنتم معاكم عربية هتلاقوا جراج متاح للحديقة.

أما لو معاكم أطفال فإحنا بننصحكم تزوروا مركز الإبداع والحضارة اللي أطفالكم هيستمتعوا فيه بكتير من الأنشطة الثقافية والترفيهية، وكمان فيه متحف الطفل اللي يعتبر أفضل متحف ثقافي للأطفال في مصر.

وبعد الراحة والثقافة وفسحة الأولاد نروح لأهم حاجة في مصر الجديدة والجولة الحرة في ميدان الكوربة الجميلة بمبانيها التاريخية وجوها المختلف عن أي مكان تاني، هتحسوا بروحكم بترفرف وأنتم ماشيين وحواليكم نسمة هواء بتنعش روحكم، وبعدها تروحوا تزوروا ميدان الجامع والإسماعيلية وكنيسة البازيليك اللي دُفن فيها البارون إمبان.

الجولة في مصر الجديدة فيها كتير ومش بتنتهي ولكن حاولنا نختصر علشان تلحقوا تعملوا يوم ترفيهي مميز يبسطكم، ولازم قبل ما تعملوا الجولة تعملوا خطة وخريطة لتحركم وتحسبوا الوقت وتعملوا حساب الزحمة لما تتنقلوا من مكان لمكان.