The Definitive Guide to Living in the Capital , Cairo , Egypt

القاهرة مليانة أماكن ترفيهية وخروجات ممتعة كتيرة، زي السينمات والمطاعم والنوادي، أو الأماكن اللي ممكن تروحها تقضي فيها اليوم كله لحد آخر النهار، بس أحيانًا بنحتاج خروجات للويك إند تكون مميزة وفي نفس الوقت مش مكلفة وتناسب الميزانية، خاصة لو آخر الشهر، علشان كده جمعنا لكم أفضل خروجات على قد الإيد لويك إند مميز في العاصمة المصرية.

 

فلوكة في النيل

من أجمل الأماكن اللي ممكن تزورها وتستمتع بجوها. تقدر تخرج مع أسرتك أو أصحابك في رحلة على فلوكة في النيل، وتقضوا أحلى وقت وسط الأغاني والمزيكا، وأنتم بتتفرجوا على منظر الأماكن على الضفتين.

 

برج القاهرة

من أشهر المعالم السياحية في القاهرة، وتقدر من فوق تتفرج على القاهرة كلها بشكل يبهرك بجماله، وكمان البرج فيه مطعم دوار، تقدر تطلب فيه وجبتك وأنت بتتفرج على القاهرة والمطعم بيلف بك 360 درجة.

 

 

فطار على النيل

اخرج من روتين أجازتك المتكرر واصحى بدري مرة وانزل جرب أحلى فطار على النيل، فيه أماكن كتيرة زي كافيهات شارع عبد العزيز آل سعود في المنيل، بتقدم أنواع مختلفة من الفطار وبأسعار مناسبة، وتقدر بعدها تتمشى على الكورنيش، أو تخلص مشوار مهم من غير زحمة.

 

الحدائق العامة

القاهرة مليانة حدائق عامة ومتنزهات كتيرة بمساحات خضراء وزهور نادرة ومناظر خلابة، تقدر تستمتع فيها بالجو الجميل وكمان فيها مطاعم وكافيهات لو حبيت تشرب حاجة، زي: حديقة الأزهر، حديقة الفسطاط، الحديقة الدولية، الحديقة اليابانية، وأكثر.

 

المتحف المصري بالتحرير

تقدر تاخد جولة سياحة في المتحف المصري بوسط القاهرة، تتعرف فيها على تاريخ قدماء المصريين وتعرف معلومات عن بلدك هتبهرك، وتشوف أشكال مختلفة من التماثيل وتعرف قصة كل واحد منهم، وطبعًا تاخد أحلى الصور للتجربة دي.

 

يا ترى خروجتكم للويك إند هتكون فين؟