The Definitive Guide to Living in the Capital , Cairo , Egypt

الحياة في كايرو -
مقترح

عشر أفكار بسيطة هتساعدك تحتفظ بسلامة قواك العقلية وقت الشغل

النجاح في العمل، نصائح للشغل، تنمية بشرية
عشر أفكار بسيطة هتساعدك تحتفظ بسلامة قواك العقلية وقت الشغل
بواسطة
Nadine El Shiaty

شغلنا في المكتب كل يوم مش بنواجه فيه شياطين ووحوش بتحاربنا وتحاول تقضي علينا، وبرضه مش جنة من الأحلام والحياة الوردية، كلنا مرت علينا أيام في الشغل شوفنا فيها أوقات صعبة وتخليك تتمنى لو اليوم فيه كام ساعة زيادة.

سواء كنت موجود في الشغل اللي بتحلم به أو بتشتغل علشان تدفع فواتيرك، إحنا بنقدم لك عشر أفكار بسيطة ممكن تساعدك تحتفظ بسلامة قواك العقلية وقت الشغل.

كفاية أعذار

كلنا عندنا زميلنا اللي دائمًا عنده أعذار ممتازة لحياته/ حياتها الملخبطة. لو كنت أنت الشخص ده ودائمًا بـ تشتكي لزملائك إزاي فترة نومك كانت قليلة أو الدوشة الفظيعة الخارجة من عند جيرانك أو أي حاجة تخلي حياتك تعيسة، نرجوك كفاية!

طبقًا لجريدة نيويورك تايمز، المتخصصان في علم النفس ستيفن برجلاس وإدوارد أي جونز بيستخدموا مصطلح “إعاقة الذات” لوصف الموضوع ده، وبيشوفوا أنها وسيلة للدفاع عن صورتك أمام نفسك.

المرة الجاية لما الكاوتش ينام منك أو المنبه ينام منك برضه الصبح، أرجوك بلاش تلعب دور المظلوم؛ حتى لو كان مديرك أو زملائك في الشغل متفهمين للموقف، مع كل مرة بتقول فيها أعذار، أنت مش بس بتقلل من كفائتك، ده كمان الناس هتبدأ تشكك في مصداقيتك.

اشتغل على حاجة واحدة وبلاش تشتيت

القلق والتسرع في الشغل –وده شيء طبيعي– نتيجة للإيميلات المهولة أو مواعيد التسليم غير الآدمية أو الشغل اللي بيوصل لك قبل ما تمشي من الشغل بعشر دقائق مش هيفيدوك بأي حاجة، ركز على تنفيذ مهمة واحدة قبل ما تبدأ في واحدة جديدة، لو بتحس أنك عاوز تنتحر لما بتشوف الإيميلات الصبح أول ما توصل لأن مافيش حاجة بتخلص، حاول تعمل شغلة ثانية قبل ما تدخل على الميل، ممكن تبدأ بأسهل شغل وتخلّص بأصعب حاجة، فيه كتاب اسمه Eat the Frog للكاتب والخبير الاقتصادي براين تريسي بيقول عكس الكلام ده، براين بينصحك تبدأ يومك بأصعب شغل عندك، وبيقول عليه “الضفدع الأعظم، الأكبر، الأقبح”. وطبقًا لكلام براين، أنت لما تخلص أصعب مهمة عندك، جسمك بيبدأ يفرز هرمون السعادة واسمه العلمي “سيروتونين”، وده مهمته أنك تشعر بالسعادة والإنجاز، بص من الآخر استخدم الطريقة اللي تعجبك، المهم أوعى تنسى قاعدة هامة “اشتغل على حاجة واحدة وبلاش تشتيت”.

ابعد عن الناس السلبية

كلنا بنشتكي.. دي عادة عالمية يا جماعة! فيه نوعين من الناس لازم تتجنبهم في الشغل: النوع الأول وهو اللي دائمًا بيشتكي وعمره ما يقدم حلول، والنوع الثاني وهو ولد مخصوص علشان يمتص الطاقة من الناس، النوعين دول بيدخلوا حياتك ويغيروا من طريقة تعاملك مع كل حاجة في حياتك.

ابعد عن الشكّايين والسلبيين في الشغل وتعامل معهم في أضيق الحدود، ليه؟ السبب بسيط، ممكن بكل بساطة تتأثر بسلبيتهم وتقلّد سلوكياتهم. كمان لو شغلك محتاج لطاقة ذهنية كبيرة فأنت محتاج لزملاء إيجابيين، اعمل كل اللي تقدر عليه علشان تبعد عن القصص الفارغة والمناقشات عديمة المعنى وحاول تتجاهل أي تعليقات سلبية ممكن تقابلك.

استمتع بالأكل في وقت الشغل

لو كان شغلك أكثر من 7 ساعات، غالبًا فطارك وغداك وممكن عشاك كمان يكون هناك. فيه أماكن بتسمح بساعة استراحة بحيث تقدر تأكل وتتعرف على الناس، بس فيه شركات ثانية مش بتقدم النوع ده من الرفاهية. بلاش الأكل على مكتبك واطلب أكلك المفضل وشجع زملائك أنهم يجربوا مطاعم جديدة معاك، أو دلّع نفسك بحاجة مختلفة من وقت للثاني.

ريّح نفسك

أوقات بنحتاج حاجات بسيطة علشان تشجعنا وتحمسنا في الشغل، لو قضيت 16 ساعة صاحي، فأنت غالبًا هتقضي أكثر من نصفهم على مكتبك، وبالتالي لازم تكافئ نفسك بحاجة مختلفة تغيّر من شكل مكتبك وتحسسك بالراحة، الموضوع بسيط، يعني ممكن نبات أو أباجورة أو شمع معطّر أو أي حاجة تشوف أنها ممكن تزوّد من نشاطك في الشغل.

ممكن تفكر في حاجة مبتكرة وتكتب مقولاتك المفضلة، أو النكت اللي بتحبها أو مج القهوة المفضل عندك وتهزر كل ما تحس إنك محتاج تقول حاجة مضحكة، الفكرة أنك تتعود تتريق على سوء حظك بدل ما تزعل منه، أصل مين عارف، مش يمكن روح الدعابة دي تساعدك في أي أزمات ممكن تحصل.

خليك دائمًا مستعد

مفتاح النجاح هو الاستعداد المستمر، أنك تنجح في حياتك داخل المكتب مش معناها تنجز شغلك وخلاص، الموضوع كمان له علاقة بسلوكك ناحية الشغل واستعدادك للمهمات الجديدة.

لو شركتك مش بـ توفر الأدوات المطلوبة، زور أقرب مكتبة منك واشتري كل حاجة تحتاجها من دفاتر وورق ملاحظات لاصق لغاية الأجندات السنوية والدبّاسة، وأنت هناك كمان اوعى تنسى بالمرة تشتري شوية أقلام؛ مستحيل تعتمد على قلم واحد في مكتب مشترك.

دائمًا وفّر لنفسك الدافع

كلنا عدينا بالمرحلة دي، لما تمر عليك أيام وعندك كمية شغل تحسسك أن طفل عمره 10 سنين قاعد على صدرك ومربَّع، وطفل من الوزن الثقيل كمان، يومك بيكون عبارة عن مواعيد تسليم مش بتنتهي، وقائمة شغل بطول نهر السين، وملايين الإيميلات ومافيش حاجة فيهم بتخلص في ميعادها، صحيح لازم ساعات يحصل لك ضغط عصبي وأيام صعبة في الشغل، بس فيه حاجات تقدر تعملها ترفع من حماسك للشغل.

حمّس نفسك في الشغل عن طريق عمل جدول بأنشطة يومية تعملها بعد الشغل، اشترك في جيم، اخرج مع أصحابك أو حتى خطط للسفرية اللي طول عمرك بتحلم بها في أجازة الشتاء، الفكرة أنك تقدم لنفسك أي دافع يخرجك من حالة الكسل والتعب ويخليك تكمّل المشوار خصوصًا في أيام الشغل الصعبة.

خليك اجتماعي

أنت مش رايح الشغل علشان تكوّن صداقات.. إحنا معاك، بس أنك تعمل شبكة علاقات أو مجموعة من الأصدقاء تتكلم معاهم وقت شرب القهوة أكيد فكرة هايلة، وعلى حسب كلام الكاتب وخبير السعادة في العمل ألكسندر جيرلوف أن لما الموظفين بيكون بينهم علاقات كويسة في الشغل ده بيزود الإنتاجية والابتكار ويوفر بيئة عمل سعيدة.

لو مش عارف تتعامل مع زملائك بصفتهم بشر زيك وتبني معاهم علاقة إيجابية، أكيد هتعاني كثير في مسيرتك المهنية، أنك تعرفهم وتتعامل معاهم هيساعدك على التواصل بصورة أحسن والثقة تزيد بينكم وتقدروا تشتغلوا أحسن.

أهم حاجة أنك تقضي وقت لطيف مع زملائك في الشغل أو تشترك في حفلات أعياد الميلاد المقامة في المكتب، مين عارف.. يمكن دول اللي يقفوا جنبك وقت الشدة.

اوعى تنتظر تقييم أحد

كثير مننا بيحصل لهم انعدام ثقة أو فتور لو مافيش تعليق إيجابي أو مدح لشغلهم، صحيح فيه مديرين بيركزوا على تقدير مجهودك كل وقت والثاني، كثير منهم مش بيعلقوا على جودة أدائك في الشغل، أوعى تهتم بالحصول على اعتراف صريح بتميزك في الشغل. مهما وقف مديرك أمام ترقيتك، شغلك وكفاءتك –سواء كانوا كويسين أو وحشين– معروفين، قدم كل عطاءك ومجهودك للشغل واوعى تنتظر تقييم؛ كمان لازم نقول كلمة حق، وهي أن في الشغل مافيش حد هيصفق لك بعد كل فكرة عبقرية تخرج منك.

اوعى تقطع علاقات

بيعدي علينا وقت كل هدفنا فيه أننا نبدأ فصل جديد في حياتنا، بس لازم لما نسيب شغلنا نحافظ على علاقاتنا الجيدة مع زملائنا والمديرين، حافظ على العلاقات وصارح مديرك أنك عاوز تطور من نفسك وتنمي قدراتك من خلال شغلك الجديد وأنك صحيح مشيت من الشغل لكن العلاقات زي ما هي. في النهاية، أحسن حاجة تسمعها “أتمنى لك التوفيق في مستقبلك”، أكيد أحسن من “في ستين داهية”.

نتمنى لكم التوفيق في مستقبلكم!

مقترح