The Definitive Guide to Living in the Capital , Cairo , Egypt

القاهرة مدينة متغيرة، كل يوم فيها جديد، وعلشان إحنا في كايرو 360 عارفين كويس قد إيه كتير مننا بيحنوا للقاهرة زمان، خصوصًا مواليد الثمانينيات والتسعينيات، فهنفتكر معاكم 3 أماكن ترفيهية كانت هي أساس طفولتنا داخل القاهرة، ورغم إن الأماكن دي قفلت، إلا إنها هتفضل عايشة في قلوبنا.

ملاهي سندباد

من أجمل الأماكن في القاهرة اللي جمعت كل الطبقات، وكانت بدايتها في سنة 1982 يعني جيل الثمانينيات وكمان التسعينيات اتعلموا يفرحوا جواها، واستمرت المدينة الترفيهية الأولى في انبساطنا لغاية ما اتقفلت سنة 2016، بعد وفاة صاحبها، وكانت تذكرتها رخيصة لا تتعدى 5 جنيه، وكانت أي أسرة مصرية تقدر تتفسح جواها وتلعب ألعاب كتير بـ100 جنيه بس.

السندباد شهدت تصوير أفلام كتير جواها، زي فيلم “اغتيال” للفنانة نادية الجندي، و”العفاريت” لعمرو دياب، و”أبو علي” لكريم عبد العزيز، وغيرهم، وكانت بتحقق إيرادات بتوصل لمليون جنيه في اليوم بموسم الأعياد، وكانت فيها ألعاب بترضي كل الفئات والأعمار، وكانت قيمة الألعاب اللي جواها بتتعدى 20 مليون جنيه وقتها.

 

ملاهي سفنكس

أي حد كان بينزل شارع جامعة الدول العربية زمان ماكنش فارق معاه أي حاجة غير إنه يروح ملاهي سفنكس في ميدان سفنكس عند شارع أحمد عرابي في المهندسين، واللي حاليًا بقت جراج عربيات، تحت كوبري 15 مايو، وكان موجود في الملاهي لعبة التفاحة بالعسل والأراجوز، والكور، وبيت الرعب، والدودة، والزحليقة، وكان من المتعارف عليه أن خروجة معظم أهالي الجيزة كانت هناك.

ماجيك لاند

“تعالوا نروح على المتعة بجد، في ماجيك لاند”، ده كان إعلان مدينة ماجيك لاند، أول مدينة ألعاب وخدمات متكاملة في مصر، كان فيها مسرح كبير وعروض دولفين وجزيرة الديناصورات والنهر السريع ومبنى للألعاب الالكترونية، ومنطقة الغابات، و السموليتور، ولعبة الحوت الطائر، وغيرها من الحاجات المميزة جدًا والمختلفة في مصر، وفيه كلام كتير إنها هترجع تاني قريب بعد التطوير ونتمنى أن ده يحصل.

التقرير عن الـ3 أماكن دول دخلونا في حالة حزن على أجمل أماكن طفولتنا، ونتمنى أنكم تشاركونا ذكرياتكم معاهم أو مع أماكن تانية “كانت أساس لمتنا” وماتنسوش أن عشقنا للأماكن دي هيفضل شاهد على القاهرة زمان، لما كانت مدينة طفولتنا المميزة.