The Definitive Guide to Living in the Capital , Cairo , Egypt

الجو اليومين دول متقلّب شوية، وده طبيعي جدًا في الفترة اللي بين الربيع والصيف، لكن رغم التقلّبات دي، فيه حاجة سحرية بتحصل في الجو ده… الشمس بتكون في أجمل حالاتها، خصوصًا لما تطلعوا تتمشوا تحتها بعيد عن وقت الذروة أو في الأيام اللي مافيهاش موجة حر.

هتحسوا إن كل نسمة هوا وكل شعاع شمس بيحضن جسمكم بلطف، وكأن فيه علاقة ألفة قديمة بين الإنسان والطبيعة، ألفة صعب تلاقيها في زحمة الحياة اليومية. مش بس جسمكم اللي هيحس بيها، الألفة دي كمان هتلمسوها في شكل السما، في صوت الهوا، في ضوء الشمس.

ولأن فيه لحظات بتبقى محتاجة مكان مفتوح يخلينا نشوف السماء على وسعها، جمعنالكم 3 أماكن في القاهرة تقدروا تروحوها، تستمتعوا بالجو، وتاخدوا لحظة هدوء مع نفسكم… ويا سلام لو رحتوا وقت الغروب، ساعتها بس هتعرفوا يعني إيه كلمة “سحر الطبيعة”.

الأهرامات

مين فينا مش بيحلم إنه يقعد يتأمل السماء من جنب أجدادنا؟ تجربة الأهرامات مش بس تاريخ وأثر… لأ، دي لحظة روحانية خالصة. ورغم إن مواعيد زيارة الأهرامات الرسمية بتخلص بدري، إلا إنكم تقدروا تقضوا وقت جميل في أي “رووف” قريب، تشربوا حاجة، تأكلوا أكلة حلوة، وتتفرجوا على السما وهي بتغيّر ألوانها فوق رؤوس الفراعنة. الإحساس هناك بيبقى مختلف… كأنكم بتتكلموا معاهم، وبتحكوا لهم اللي في قلبكم.

جبل المقطم

واحد من أجمل الأماكن اللي ممكن تشوفوا منها السما كأنكم بتشوفوها لأول مرة. الهدوء هناك بيخليكم تسمعوا صوت قلبكم، والنجوم في الليل بتلمع بشكل يخلّي أي حد يندهش. فيه هناك كافيهات ومطاعم كتير، تقدروا تختاروا المكان اللي يريحكم وتقعدوا تتفرجوا من غير ما تحسوا بالوقت.

وادي دجلة

لو بتحبوا الأماكن المفتوحة جدًا، وبتحبوا الطبيعة على أصولها، يبقى وادي دجلة هو المكان المناسب. المحمية دي بتوفرلكم فرصة للتخييم، أو حتى قعدة بسيطة بالعربية، تتفرجوا على السما من غير أي مباني تحجب الرؤية. وساعات الحظ بيكون حلو وتشوفوا ظاهرة طبيعية نادرة، زي شهب أو قوس قزح بيظهر مع الغروب… لحظة مش هتتنسي.