4 ظواهر فلكية هتحصل في شهر ديسمبر 2019
الانقلاب الشتوي المعهد القومى للبحوث الفلكية والجيوفيزياقية ظواهر فلكية كسوف كواكب نجوم
Omar Abd-elmaqsoud
الناس المهتمة بالفلك والأبراج وحركة الكواكب تجمع هنا علشان “كايرو 360” عندها أخبار حلوة ليكم، جيبنهالكم من المعهد القومي للبحوث الفلكية والجيوفيزياقية، هتحصل خلال شهر ديسمبر.
في تصريحات للدكتور “أشرف تادرس” رئيس قسم الفلك، في المعهد القومى للبحوث الفلكية والجيوفيزياقية، عن الأحداث الفلكية، اللي هتحصل – إن شاء الله- خلال شهر ديسمبر، قال إن فيه 4 ظواهر فلكية متوقع تحصل الأيام الجاية، بحسب تقرير نشره موقع فيتو.
الظواهر هتبدأ من أيام 13 و14 وهتكون البداية عبارة عن زخة شهب التوأميات (الجوزاء) ليلة الجمعة وفجر السبت، ودي تعتبر من أفضل الزخات الشهابية على مدار السنة، وبيوصل عدد الشهب فيها لـ 120 شهاب في الساعة.
الزخات الشهابية اللي اتكلم عنها “تادرس” ممكن تتشاف بالعين المجردة، ومش محتاجه استخدام مناظير أو تليسكوبات فلكية، بس بشرط تبعدوا تمامًا عن إضاءة المدينة، والسماء تكون صافية بدون سحب أو بخار ماء.
في 21 و22 ديسمبر، هيظهر زخة شهب الدب الأصغر (الدببيات) وهي من الزخات الخفيفة اللي عدد الشهب فيها حوالي 10 شهب في الساعة، والزخات دي بتتكون من الحطام الغبارى المتناثر على طول مدار المذنب توتل، واللي اكتشافه لأول مرة كان في سنة 1790.
لو حابين ترصدوا زخة الدببيات هيكون أحسن وقت لرصدها هو ليلة 21 ولحد فجر 22 ديسمبر 2019، وتحديدًا أفضل مشاهدة ليها هتكون بعد نص الليل، ومهم جدًا إن المكان يكون مظلم تمامًا وبعيد عن أضواء المدينة والسماء صافية.
المعهد القومي للبحوث الفلكية والجيوفيزياقية نبه إنه مافيش أي آثار سلبية لزخات الشهب على الأرض، وده لإنها هتدخل الغلاف الجوي وتتحرق على ارتفاع من 70 لـ 100 كيلو متر تقريبًا من سطح الأرض.
الظاهرة الثالثة هتكون في 22 ديسمبر، وهيحصل فيها الانقلاب الشتوي، يعني هيميل فيها القطب الجنوبي للأرض ناحية الشمس، وتكون أشعة الشمس عمودية على مدار الجدي عند خط عرض 23.44 درجة جنوب، ويعتبر اليوم ده فلكيًا هو نص فصل الشتاء، أو نقدر نقول كده أقصاه فلكيًا في النصف الشمالي للكرة الأرضية، وفي نفس الوقت هو نص فصل الصيف فلكيًا برده أو (الانقلاب الصيفي) في النص الجنوبي للكرة الأرضية، يعني اللي بيحبوا الشتاء ييجوا شمال، واللي بيحبوا الصيف ييجوا جنوب.
الظاهرة الفلكية الأخيرة هتكون في 26 ديسمبر، وهيحصل فيها كسوف من النوع الـ “حلقي” للشمس واسمه العلمي (حلقة النار)، وهو آخر كسوف وآخر حدث فلكي في سنة 2019، والي حابب يشوفه ممكن يشوفه في شمال شرق قارة أفريقيا وقارة آسيا وشمال وغرب أستراليا.
كمان ممكن يتشاف بشكل واضح في الهند وسيريلانكا وسنغافورة وأندونيسيا، لإن البلاد دي هتلاحظ إن القمر غطى حوالي 97% من مساحة قرص الشمس في لحظة ذروة الكسوف.
اللي يزعل بقى إننا مش هنقدر نشوف الكسوف في القاهرة ومعظم محافظات مصر، لكن ممكن نشوف نهايته ككسوف جزئي بعد شروق الشمس مباشرةً في سواحل البحر الأحمر لمدة دقائق في حالة صفاء السماء وخلوها من السحب والغبار.
