4 مساجد في القاهرة هيخلوا لصلاة عيد الفطر طعم تاني
صلاة العيد عيد الفطر 2023 مساجد تاريخية مساجد في القاهرة
Cairo 360
يمنى أحمد
الصورة: KHALED DESOUKI/AFP via Getty Images
العيد جه! الأيام اللي كلنا بنستناها في السنة علشان نشوف الفرحة في عيون كل الناس، الكبار قبل الأطفال، بنشوف فيه بساطة مصر وفرحتها في وقت واحد. في الأيام دي كل واحد فينا بيتلكك علشان يلاقي حاجة تفرحه، علشان كده صلاة العيد في المساجد والساحات بتعمل فرحة غير طبيعية للناس، وهي بهجة كل الأعياد.
فريق كايرو 360 بيقول لكم كل سنة وأنتم طيبين وعيد سعيد عليكم وعلى كل حبايبكم، وبيقول لكم كمان أماكن مشهورة في القاهرة لصلاة العيد. أه الساحات كتير مافيش أكتر منها، بس فيه أماكن معينة هتقدر تحس فيها العيد وتشوفه مختلف، يلا بينا نشوفها.
مسجد أبو بكر الصديق بمصر الجديدة
هتلاقي بلالين بتطير عليك، التكبيرات هناك ليها طعم مختلف، هتشوف فيها عيد القاهرة الحقيقي بالناس الطيبة والأجواء المختلفة، ومعظم المصورين الفوتوغرافيين بيختاروا صلاتهم تكون هناك علشان يوثقوا اللحظات المبهجة دي. مكانه في شيراتون المطار، جنب قسم النزهة بمصر الجديدة.
مسجد عمرو بن العاص
وسط أجواء كلها ضحك ولعب وصور سيلڤي بتلاقي عيون مصر القديمة بتبص على جامع عمرو بن العاص، أقدم جامع في مصر واللي له شعبية كبيرة جدًا في القاهرة في الأيام العادية ما بالك بصلاة العيد! الميزة في الجامع مش في إنه قديم بس، لكنه بقى بيجمع بين القدامة والحداثة ودي هتكون أول صلاة عيد بعد التجديد فهيكون حاشد حرفيًا، جرب تصلي هناك واستمتع بالأجواء الجميلة دي. تقدر تروح له عن طريق مترو مارجرجس وتسأل هناك عن مجمع الأديان.
مسجد السلطان حسن
المدرسة اللي كانت بتعلم المسلمين شروط وصحة صلاة العيد على المذاهب الفقهية الأربعة في يوم من الأيام لسه لحد دلوقتي فاتحة أبوابها علشان تستقبل الناس لصلاة العيد، وكأن الجامع ده قادر يشيل فرحتهم من قرون طويلة ويعلمهم معنى الفرحة اللي الأطفال بيعملوا لها هناك جو مختلف وحقيقي. تقدر تنزل ميدان السيدة عائشة وتتمشي لحد هناك.
الجامع الأزهر
وأخيرًا قررنا نرشح لك المسجد اللي جدرانه بتتغسل من الفرحة مع كل صلاة عيد، الساحة اللي أرضيتها بتضوي زي اللؤلؤ وبرد وسلام على قلوب اللي فيها! أي صلاة بتكون مختلفة بين جدران الجامع العتيق ده، بس منعتقدش هيكون فيه أجمل من صلاة يوم كله بهجة وفرحة. المسجد موجود في حي الجمالية في مقابل مسجد سيدنا الحسين.
نتمنى عيدكم يكون مختلف.. كل سنة وأنتم طيبين يا شعب مصر الطيب.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
