The Definitive Guide to Living in the Capital , Cairo , Egypt

العيد فرحة وأجمل فرحة زي ما علمتنا الجميلة صفاء أبو السعود، وعلشان الفرحة تكمل لازم معاها خروجة مميزة ونشاط جديد ولما النشاط بيكون مرتبط بنهر النيل بيكون له رونق مختلف وشعور وإحساس جميل، فما بالكم لو الأنشطة دي في حضن النيل بجد!!

فيه 5 أنشطة تقدروا تعملوها في عيد الأضحى في حضن نهر النيل بأسعار مميزة وحلوة ويبقى العيد عيدين وكل سنة وأنتم طيبين.

الأتوبيس النهري

الأتوبيس النهري من أجمل الأنشطة اللي ممكن تستمتعوا بها في النيل، وهو كمان أرخص حاجة موجودة في نهر النيل، وهتلاقوه بمحطات “ماسبيرو – الجامعة – ساحل روض الفرج – مصر القديمة – إمبابة – أبو الفدا – المعصرة – الحوامدية”، وسعر التذكرة على قد الإيد.

وبتبدأ مواعيد عمل الأتوبيس النهري من الساعة 6 والنصف صباحًا وحتي الساعة السادسة مساءً مع توقعات بمد فترة العمل خلال إجازة العيد والصيف إلى الساعة الثامنة مساءً.

 

كرة النيل

هتقدر تمشي في النيل من غير ما تتبل! تقدروا تعملوا ده في Il CAMPO واللي بيقدموا خدمة المشي على النيل في كرة سحرية شفافة، الكرة دي بتكون آمنة وتتحمل الوزن وكمان غير ضارة، وبيكون سعرها 75 جنيه لكل 15 دقيقة، وماتنسوش كمان أن عندهم ألعاب كتير سواء ضمن باقات الاشتراك أو ألعاب فردية، ويفضل بالتأكيد أنكم تكونوا ضمن جروب علشان الألعاب الجماعية وتستمتعوا أكتر.

 

كياك النيل

فكرة أنك تبقوا قاعدين في مكان وبتلفوا النيل بكل اتجاهاته وبراحتكم وبتعملوا رياضة محبوبة فكرة عبقرية، وده اللي تقدروا تعملوه من خلال ركوب قارب صغير، وتجدفوا بمجداف واحد يمين وشمال، وهي من أقدم الرياضات في العالم، وموجودة في أماكن كتير في القاهرة “الزمالك – الدقي – المنيل – المعادي”، ويبدأ سعرها من 100 جنيه، ودايمًا بيبقى فيه عروض ورحلات بأسعار أقل.

رحلات الكروز

من أجمل الأنشطة اللي مليانة سعادة هي النايل كروز واللي بتكون عبارة عن رحلات غداء أو عشاء ومعاها فقرات فنية كتير زي التنورة والمزمار البلدي والرقص الشرقي وفرق الفنون الشعبية وغيرها، وكمان المركب بتتحرك لمدة ساعتين في رحلة وسط النيل بأجواء مميزة، ودايمًا بننصح برحلات ما قبل الغروب للاستمتاع أكتر، وأسعار الرحلات بتبدأ من 350 جنيه في الأيام العادية وموجودة في “المعادي – الزمالك – الدقي”.

التاكسي النهري

معروف باسم Nile Taxi ومميز بلونه الأصفر. له مواعيد خاصة للتحرك من المحطات الرئيسية “المعادي – ماسبيرو”، وهو عبارة عن لنش صغير بيساع 11 فرد، وفيه أصغر منه بيساع 5 أفراد فقط، وبيغطي مناطق “ماسبيرو – جاردن سيتي – الزمالك – المنيل – المعادي” وموجود في كل منطقة منهم مرسى خاص عليه اليافطة الخاصة بيه، وبيقطع المسافة من نايل سيتي لحد المعادي لو مباشرة بدون توقف في 15 أو 20 دقيقة، ولو فيه توقف بتوصل لـ30 دقيقة، وتقدروا تركبوه بتذكرة للفرد في المواعيد الرسمية بسعر 75 جنيه للفرد، أو حجزه خاص بسعر 375 جنيه بأقصى عدد 5 أفراد.