The Definitive Guide to Living in the Capital , Cairo , Egypt

رنا شرف

 شهر رمضان من أجمل شهور السنة، وياريت كل السنة رمضان، أيامه بتسعدنا وبتفرحنا، أيام مباركة وجميلة ومرتبطة معانا بحاجات كتير.

في الموضوع ده هنكلمكم عن 5 حاجات جميلة بتخلينا نحس ببهجة رمضان بجد رغم بساطتها.

المشروبات الرمضانية

ومين فينا مش بيشوف منظر محلات العصائر والزحمة عليها في رمضان؟ منظر جميل، رمضاني جدًا، ومش هتلاقيه غير في شوارع مصر في رمضان قبل الفطار.

العرقسوس والسوبيا والتمر الهندي والكركديه والخروب وقمر الدين والبلح باللبن، كلها مشروبات مرتبطة بالسفرة الرمضانية ومن العادات المصرية الجميلة.

وعلشان تحس برمضان بجد لازم يكون على سفرتك واحد من المشروبات دي.

زينة رمضان

من عاداتنا برضه في استقبال شهر الصوم، تزيين الشوارع بالزينة، والأطفال بيعملوا احتفال كبير في الفترة دي، وتلاقي كل بيت بيتسابق بعمل زينة جميلة مش بس في الشوارع كمان البيوت بتتزين، من مفارش سفرة لأنوار جميلة في البيوت، وحتى كوبيات وأطباق مرسوم عليها أشكال رمضانية.

حلويات رمضان

مستحيل رمضان يعدي من غير ما نشتري حاجة من محلات الحلويات، خاصة الكنافة اللي بنهتم بيها اهتمام كبير، ولحد النهارده فيه ناس لسه بتعمل الكنافة بالطريقة اليدوية القديمة والقطايف كمان.

صلاة التروايح

صلاة التروايح من أبرز العبادات في شهر الصوم، وطبعًا بتكون طول شهر رمضان، ومن أحلى المناظر اللي ممكن تشوفها في ليالي رمضان مشهد الناس وهي رايحة المسجد تصلي، مشهد فيه اطمئان جميل وبركة حقيقية.

عمل الخير

من المظاهر الجميلة كمان توزيع الطعام وقت الفطار في الشوارع، كتير من الناس مابتلحقش تكون في بيتها وقت الإفطار، لظروف شغلها مثلًا، توزيع الأكل عليهم بيكون مشهد جميل، ناس بتقوم بتوزيع الأكل والعصير وده تصرف لوحده قادر يخلينا نحس بالخير والأمان في شهر البركة.

 

كل سنة وأنتم بخير يا أهل القاهرة الكرام!