5 حاجات تخليك تحب القاهرة
Mohammed Sabry
الزحمة والدوشة والمشاوير البعيدة، الدائري وطلعة المحور، كوبري اكتوبر أو 15 مايو، الطوابير اللي مش بتخلص، مدام عنايات اللي عندها الدمغة في الدور التالت في أي مصلحة حكومية. كلها حاجات أساسية بتيجي في دماغك بمجرد ما تسمع كلمة “القاهرة”. إحنا ماننكرش ده، لكن خلينا نعترف إن القاهرة فيها حاجات مش موجودة في بلد تانية في العالم مش بس مصر. حاجات تخليك غصب عنك تحبها وترتبط بيها. خلينا ناخد فكرة سريعة كده عن الحاجات دي:
وسط البلد
ماينفعش تبقا من سكان القاهرة وماعدتش على وسط البلد. المكان اللي هتقابل فيه كل أنواع الناس، باختلاف ثقافاتها وخلفياتها. أو أكبر تجمع للقهاوي ممكن تقعد عليها مع أصحابك تدردشوا مع شيشة وكوباية شاي. ده غير السينمات والمولات. وكمان محلات الأكل الكتير. باختصار كده، مفيش حاجة ماتتعملش في وسط البلد.
السينمات البديلة
السينمات هنا مش مقصود بيها السينمات العادية، إطلاقًا. مقصود بيها دور العرض والمراكز اللي بتعرض أفلام المهرجانات، أو الأفلام العادية. بس بأسعار رمزية جدًا أو حتى ببلاش. زي زاوية أو سينما دال أو درب 1718، وغيرها من الأماكن اللي مش ممكن تلاقيها في أي بلد تانية.
الأنشطة والهوايات
لو انت موهوب، بتحب ترسم أو تلعب مزيكا أو بتحب التصوير أو أي نوع نشاط انت بتفضله. لو عايز تاخد كورس في مجال معين لشغلك أو لدراستك. القاهرة مليانة أماكن و work spaces بتوفر ورش عمل وكورسات كتير في المجالات دي كلها. وكمان بأسعار على قد الإيد. زي شفشاون ومساحة وملاذ وغيرهم كتير. وهتلاقيهم بسهولة من غير تعب.
الرحلات
كلنا بنحب الرحلات. سواء رحلات مصايف أو الرحلات اللي بنطلع فيها نزور أماكن أثرية، أو نسكتشف جوانب مختلفة من الطبيعة، أو حتى نطلع نقضي day use في أي مكان نغير بيه المود. في القاهرة هتلاقي أكتر من مكان بينظم الرحلات دي لكل مكان في مصر طول السنة. تقدر تعرف كل المعلومات من خلال صفحات وجروبس كتير على فيسبوك.
المراكز الثقافية
في القاهرة بس هتلاقي أماكن ومراكز الثقافية كتير تقدر تحضر فيها حفلات التراث الشعبي والفلكلور والفنون الصوفية. وتتعرف على ألوان كتير مختلفة من الفنون، وفرق من كل أنحاء مصر. تقدر تحضر الحفلات دي في أماكن زي الربع أو مكان أو مسرح الضمة. وكمان هتلاقي الصالونات الثقافية اللي فيها بيتم مناقشة أنواع مختلفة من الكتب والروايات والقصص.
الظاهر كده إن دايمًا في حاجة بتخليك تحب القاهرة ونيلها وطول ليلها ومواويلها، حبها واتبسط على قد ما تقدر بقى.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
