The Definitive Guide to Living in the Capital , Cairo , Egypt

مافيش أجمل من الظواهر الفلكية، لكن الأجمل لما تكون الظواهر الفلكية دي هي زينة شهر رمضان في السماء، وخلال السطور الجاية هنقول لكم على أهم الظواهر اللي هتشهدها سماء مصر في شهر رمضان، واللي تقدروا تشوفوها بالعين المجردة أو من خلال التليسكوب.

الدكتور أشرف تادرس، رئيس قسم الفلك بالمعهد القومي للبحوث الفلكية سابقًا، قال في تصريحات لموقع اليوم السابع إن فيه 6 ظواهر فلكية طبيعية هتظهر في مصر الفترة الجاية، وهتبدأ يوم 6 مايو، وفي اليوم ده هنشوف “زخة شهب إتا الدلويات”، واللي هتحصل نتيجة مرور كوكب الأرض في مخلفات مذنب هالي، وسبب تسمية الظاهرة دي بالدلويّات هو أن الشهب بتظهر وكأنها جاية من كوكبة الدلو قرب نجم إيتا، وهو ألمع نجوم الدلو، وهيكون متوسط عدد الشهب المرئية في اليوم ده 30 شهاب في الساعة.

أما يوم 13 مايو الجاي، فهنشوف ظاهرة اقتران القمر والمشترى وزحل في مشهد جميل، وده هيكون بعد منتصف الليل وحتى قرب الفجر.

ويوم 15 مايو الجاي هيكون ميعادنا مع ظاهرة اقتران القمر والمريخ مع بعض، وده هيكون في حوالي الساعة 2 صباحًا.

أما يوم 18 مايو الجاي، فهنستمتع بمشهد اقتران كوكبي المشترى وزحل.

ويوم 22 مايو الجاي، هيكون فيه اقتران بين كوكبي عطارد والزهرة قبل وبعد غروب الشمس.

وأخيرًا، يوم 24 مايو الجاي هتقدروا تشوفوا ظاهرة اقتران كوكب عطارد مع كوكب الزهرة والقمر قبل وبعد غروب الشمس مباشرة.