The Definitive Guide to Living in the Capital , Cairo , Egypt

ملل العيد، المفروض يكون في متلازمة  نفسية بالاسم دا، يدرسها علماء النفس ويحاولوا يلاقوا ليها حل، أصل من الآخر كلنا بنستنى العيد، بنفرح بليلته وننشكح بصوت الست وهي بتقول يا ليلة العيد أنستينا وجددتي الأمل فينا، شوية شوية بتدخل صفاء أبو السعود بالعيد فرحة وبعد كدا هوب أمل بيجيلها صدمة عصبية من الملل، والزهق.

كل سنة، نفس الصدمة، أفكار كتير عن الخروجات والحاجات اللي ممكن تتعمل واتفاقات، لكن مفيش حاجة بتحصل، كأننا ماتعلمناش من السنة اللي قبلها، نعرف ناس شايلين هم ملل عصر أول يوم العيد من نص رمضان تقريبًا، دول بقى الناس العاقلة اللي عارفين إن العيد في مصر للأسف مش للخروج، إلا لو الحالة المادية تسمح بالسفر ودا بنحجزله قبلها بفترة معقولة، غير كدا الواحد بيقعد بكرامته في البيت، بعيدا عن مشاهد التحرش في الحدائق العامة، ووسط البلد، وكمان بعيد عن الزحمة الخانقة في المولات، ناهيك عن إن حتى الشوبنج بيكون غير متاح لأن معظم المحلات قافلة، لذلك وعشان كل الناس اللي شايلة هم الملل، كتبنالكم الموضوع دا …ليكم إنتم مش لحد تاني.

• افتح الـ “Saved” أرجوك

عارف إنت الحاجات اللي طول ما انت بتعمل سكرول داون على الفيس بتعملها “Save” أيوة الحاجات دي اللي ياما كتبت على البيدج بتاعتك إنها هاتجري وراك يوم القيامة، دا أنسب وقت عشان تفتحها، اللي فات معاده احذفه، المقالات اللي عاوز تقراها قسمهم على الأيام، الأفكار اللي عاوز تنفذهم، حولهم لبنود على جدول أعمالك، المهم فضي البنود المحفوظة كلها، هتحس براحة نفسية رهيبة.

• افتح النوت بوك المركون وحط خطة

كام مرة اشتريت فيها نوت بوك عشان عجبك شكلها؟ طيب كام مرة حطيت خطة للأيام الجاية وفشلت؟ طيب بلاش دا كله، خلينا نفتح صفحة جديدة، وطبعًا مافيش أجمل من العيد إننا نفتح فيه صفحة جديدة محترمة نكتب فيها كل الحاجات اللي نفسنا نعملها، بما فيها الحاجات اللي حفظناها في العناصر المحفوظة –واخدلي بالك- واللي اتكلمنا عنها فوق، دوس بقى وارسم أحلامك وطموحاتك وعيش.

الأهم من دا كله إنه تبدأ تنقل مشاعرك للورق، خلي نوت بوك من الكتير اللي عندك ليك، اكتب فيها مشاعرك اللي مزعلك واللي مفرحك واللي نفسك تعمله، كتابة المذكرات بتفرق جدًا جدًا في حياة الشخص، كفاية نقولك عن اللحظة اللي بترجع فيها لمذكرات كتبتها من تلات أربع سنين مثلا فتتفاجئ بالحياة كانت عاملة معاك إزاي وترصد إنت بتتقدم في حياتك ولا بترجع لورا.

• إعمل حاجة حلوة جدًا

كلنا جوانا طباخ صغنن كدا، نفسه يخرج المارد اللي جواه ويوري الناس كلها هو قد إيه عبقري، خرجه بقى يا أخي وإعمل حاجة حلوة تكون محضر مقاديرها وكاتبها كويس لو مكنتش بتعرف، فاجئ أهل بيتك، أو صحابك، هاتلهم شلل رعاش من المفاجأة، عارفين إنه شهر الكحك والبسكوت والذي منه لكن فادج كيك مش هاتضر، ولا حتى صينية كيك.. منظر الحلويات وهي بتتحول من شيء لشيء دا مشهد عبقري ما يعرفش قيمته إلا الناس اللي بتقرفص على ركبها عشان تتفرج من شباك الفرن الإزاز على العملية العبقرية وهي بتتم.                  

• شغل التسجيل على أغاني التسعينات واقف في البلكونة (زي زمان)

فاكر؟ خلينا نفكرك، شرايط عمرو دياب، وأصالة، وبعد شوية شيرين، التسجيل بصوت عالي، بوستر في البلكونة لحد كنت بتحبه، مكان صغير كان هو العالم بتاعك لفترة مش قليلة، مش همك الناس اللي سامعة الصوت العالي، ولا الشوية اللي بيكلموا أبوك عشان يخليك توطي، لحظات السعادة الغامرة وانت مشغل حاجة بصوت عالي وعايش وبتتابع الناس رايحة جاية، استعيدها، شغل أغاني الذكريات وأقف في البلكونة، واستعيد اللحظة دي اللي انت بس بتتفرج من فوق ومستمتع بأغنية حلوة، خلي الناس تقول ايه البني ادم المجنون دا، مش مهم، اقف ، واسرح واتبسط، الوقفة في البلكونة دي متعة مفتقدينها.

يا سلام لو كنت من هواة الرسم، طبعا بقالك كتير أوي ما رسمتش، يمكن من أيام الثانوية العامة، حضر كراسة رسم وألوان وارسم، هاتلاقي الموضوع صعب في الأول، أصل فات كتير، لكن صدقني أجواء العيد مع الأغاني الجامدة مع شوية رسم وإنت لوحدك في أوضتك هايرجعوك لنفسك كتير.

• نضف شنطتك ورتب هدومك لبعد العيد

آخر يوم في العيد، شوف الشنط اللي بتحبها، اللي عاوز يتغسل اغسله، اللي عاوز يفضى رتبه، شوف هاتلبس ايه خلال الفترة اللي بعدها، ناقصك ايه تشتريه لما المحلات تفتح، أصلا عاوز تكمل بالاستايل دا ولا بتفكر تجدد شوية في مظهرك، كل دي قرارات هاتخدها بأريحية بعدن يومين تلاتة أجازة محترمين.

• نام كويس

عارفين الأيام اللي بنصحى فيها عنينا حمرا من قلة النوم ومتعكنين، أيوة دلوقتي أنسب وقت نعوضها، اظبط المنبه على معاد بدري، ولما يرن أطفيه بتشفي وكمل نوم لحد ما تشبع، دي حاجة مابتتعوضش إطلاقا، نام براحتك، واصحى اشرب نسكافيهك، اتفرج على فيلم محترم، الأنتخة شيء عظيم لو تعلم.

• إنزل الكشك إشرب بيبسي

بعد زيارات القرايب، وهري الكحك والبسكوت ومسرحية العيال كبرت وسك على بناتك وكل الهم اللي إنت حافظه دا، إسحب نفسك بالراحة، خبط على جار بتحبه، بس المرة دي ماتروحوش القهوة، على أقرب كشك، اشتروا ازازتين بيبسي، واقفوا كدا في عالم اللاشيء، هاتحس الهموم بتقع من دماغك وانت راجع لوحدها، وقفة الكشك دي بالدنيا، وغالبا هاتبدأ الإزازة وانتو اتنين، هاتخلصها وانتوا 12 واقفين بيكملوا معاك الحديث !